Ադրբեջանը մարտի է նետում արդեն իսկ վերջին ռեզերվները. վարչապետ (ՎԻԴԵՈ)

ԵՐԵՎԱՆ, 21 հոկտեմբերի./Նովոստի-Արմենիա/. Ադրբեջանը մարտի է նետում արդեն իսկ վերջին ռեզերվները, հայտնել է ՀՀ վարչապետ Նիկոլ Փաշինյանը Facebook-յան ուղիղ եթերի ժամանակ: 

«Առաջնագծում բավականին բարդ, դժվար իրավիճակ է ստեղծվել: Արցախի ողջ հարավով մարտական գործողություններ են ընթանում։ Այստեղ կա շատ կարեւոր նրբություն. մեր դիտարկումները ցույց են տալիս, որ հակառակորդը մարտի է նետում արդեն իսկ վերջին ռեզերվները։ Այո, նրանց ռեսուրսները շատ-շատ մեծ են, բայց մեր հերոս զինվորները աննկարագրելի ծավալի կորուստներ են պատճառում»,- հայտնել է նա։

Վարչապետը նշել է, որ հայկական կողմի գնահատականներով, Ադրբեջանի ռազմական տեխնիկայի կորուստների մի մասը հասնում է 1,5 մլրդ. դոլարի:

Նա նշել է, որ այդ թվում հենց դա է պատճառը, թե ինչու Ադրբեջանի հումանիտար հրադադարի չի համաձայնում, որովհետև կան մարտի դաշտում մնացած մեկ տասնյակ հազարին մոտ դիակներ, որոնք պիտի «իրենց կազմակերպած էյֆորիայի ֆոնին վերադառնան»:

Բացի այդ, վարչապետը նշել է, որ մյուս պատճառը, թե ինչու Ադրբեջանը չի պահպանում կրակի դադարեցման մասին պայմանավորվածությունները, այն է, որ կբացահայտվեն վարձկանների դիակներ, ինչպես նաև թուրքական զորքերի զինվորների դիակներ

«Մենք այսօր պիտի ընդամենը կրկնենք մեր պատմության ոչ թե աղետալի հատվածը, այլ՝ հերոսական հատվածը, որովհետև 1990-ականներին ղարաբաղյան առաջին պատերազմի ժամանակ վիճակը շատ ավելի հուսահատ էր, բարդ էր, թվում էր՝ ոչ մի ելք չկա, բայց մեր ժողովուրդը գտավ այդ լուծումը, որովհետեւ կային մարդիկ, ովքեր իրենց վրա վերցրին հայ ժողովրդի ճակատագրի պատասխանատվությունը, այսօր էլ կան նման մարդիկ, բայց այդ մարդկանց կողքը պետք է կանգնել ու կանգնել պինդ», - հայտնել է Փաշինյանը։