ԵՐԵՎԱՆ, 21 ապրիլի./Նովոստի–Արմենիա/. ՌԴ արտգործնախարար Սերգեյ Լավրովի հայաստանյան այցի ընթացքում ԼՂՀ խնդրի կարգավորման նոր առաջարկություններ չեն լինի, «Հայկական ժամանակ» թերթին հայտնել է ՀՀԿ խմբակցության անդամ Արտակ Դավթյանը։
ՌԴ ԱԳ նախարարն ապրիլի 21–ին երկօրյա այցով կայցելի Հայաստան։
«Գիտենք՝ նախկինում ինչ սկզբունքների շուրջ են քննարկումներն ու բանակցությունները տեղի ունեցել։ Այդ քննարկումները հենց այդ շրջանակում էլ պետք է լինեն, չեմ կարծում, որ նոր առաջարկություններ կլինեն, որոնք մինչ այժմ հայտնի չեն եղել մեր հանրությանը», – նշել է Դավթյանը։
Իշխանական պատգամավորը դժվարացել է ասել քառօրյա պատերազմից, ՌԴ արտգործնախարարի այցից հետո ԼՂՀ խնդրի լուծումը կթևակոխի բեկումնային փուլ, թե՞ կրկին կսառեցվի, գրում է թերթը։
«Մի քանի օր առաջ էլ ՌԴ վարչապետի ելույթը եղավ այդ մասին եւ ինքը այսպիսի մի ձեւակերպում արեց՝ եթե ընտրում ենք մարդկային կյանքեր՝ սառեցված հասկացության մեջ, ապա ինքը սառեցվածի կողմնակից է, սա պատահական պաշտոնյայի արտաբերած բառեր չեն, փաստացի Ռուսաստանի Դաշնության երկրորդ պաշտոնյան է արտաբերել այս խոսքերը։ Եթե առաջարկությունը լինի անընդունելի ՀՀ և ԼՂՀ պետությունների համար, ապա չի ընդունվի», – նշել է Դավթյանը։ –0–