Ղարաբաղում զոհվածների որոնողական աշխատանքների արդյունքում հայտնաբերվել են ՊԲ երկու զինծառայողների մարմինները
ԵՐԵՎԱՆ, 9 ապրիլի./Նովոստի–Արմենիա/. Ղարաբաղա–ադրբեջանական շփման գծում վերջերս գրանցված մարտական գործողությունների հետևանքով զոհվածների որոնողական աշխատանքների արդյունքում հայտնաբերվել են ԼՂՀ ՊԲ–ի երկու զինծառայողների դիակները։
Որոնողական աշխատանքներն իրականացվել են ապրիլի 8–ին ժամը 15։00–ից մինչև 20.00–ն Ստեփանակերտի և Բաքվի միջև հայտարարված «լռության ժամանակահատվածի» շրջանակում` Կարմիր Խաչի Միջազգային Կոմիտեի և ԵԱՀԿ Մինսկի խմբի միջնորդությամբ։
Աշխատանքների արդյունքում հայտնաբերվել են ՊԲ զինծառայողներ` կրտսեր սերժանտ Ռոբերտ Ալեքսանդրի Աբաջյանի (ծնվ. 1996թ.) և շարքային Անդրանիկ Ատոմի Զոհրաբյանի (ծնվ. 1996թ.) դիակները, հաղորդում է ԼՂՀ ՊՆ մամուլի ծառայությունը։
Որոնողական աշխատանքների ընթացքում կրակի դադարեցման շուրջ պայմանավորվածությունների խախտում չի արձանագրվել:
Ապրիլի 1-ի լույս 2-ի գիշերը ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները։
Օպերատիվ տվյալներով`մարտական գործողությունների ընթացքում ոչնչացվել է 2 ուղղաթիռ, շուրջ 30 տանկ, «Գրադ» տիպի համազարկային կայանք, ծանր հրանետային համակարգ (ТОС), ինժեներական տեխնիկա, 7 անօդաչու սարք։ Ադրբեջանական զինուժը տվել է 300-ից ավելի մարդկային կորուստ:
Հայկական կողմը կորցրել է 14 տանկ, ունի 44 զոհ, մոտ 122–ը վիրավոր է, անհետ կորած է համարվում 21–ը։ Զոհվել են նաև քաղաքացիական անձինք, այդ թվում` մեկ երեխա և յոթ կամավոր։ Մարտական գործողությունները դադարեցվել են ապրիլի 5–ին մոտավորապես ժամը 12։00–ին, երբ ուժի մեջ մտան համապատասխան պայմանավորվածությունները։ -0–
