Երևանում «BMW»-ն և «Audi»-ն իրար են բախվել․ 7 մարդ հոսպիտալացվել է, այդ թվում՝ 2 և 8 տարեկան երեխաներ (ՖՈՏՈ)

ԵՐԵՎԱՆ, 20 օգոստոսի․ /Նովոստի-Արմենիա/․ Օգոստոսի 19-ին, Ժամը 20։08-ին Ճգնաժամային կառավարման ազգային կենտրոն տեղեկություն է ստացվել, որ Երևանի Գարեգին Նժդեհի փողոցում տեղի է ունեցել ՃՏՊ։ Այս մասին հայտնում է ՀՀ ԱԻՆ մամուլի առայությունը։

Դեպքի վայր է մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից երկու մարտական հաշվարկ, որից մեկը, անհրաժեշտությունը վերանալու պատճառով, ետ է վերադարձել։

Պարզվել է, որ Գարեգին Նժդեհի փողոցի թիվ 56ա շենքի մոտակայքում բախվել են «BMW» (վարորդ՝ Վահե Պ․, ծնված 1981 թ․) և «Audi» (վարորդ՝ Արթուր Ե․, ծնված 1974 թ․) մակնիշների ավտոմեքենաները։

«Մինչ փրկարարների՝ կանչի վայր հասնելը տուժածներ Վահե Պ․-ն, Արթուր Ե․-ն, Լիլիթ Հ․-ն (ծնված 1984 թ․), Մարինե Հ․-ն (ծնված 1983 թ․) տարբեր աստիճանի մարմնական վնասվածքներով հոսպիտալացվել են «Էրեբունի» ԲԿ, իսկ Արամ Պ․-ն (ծնված 2018 թ․), Դավիթ Ե․-ն (ծնված 2012 թ․) և Մելիսա Ե․-ն (ծնված 2002 թ․)՝ «Սուրբ Աստվածամայր» ԲԿ»,- ասվում է հաղորդագրության մեջ։

Փրկարարները հոսանքազրկել են ավտոմեքենաները և իրականացրել ավտոճանապարհահատվածի լվացման աշխատանքներ։-0-