Երևանի բնակարաններից մեկում 65–ամյա տղամարդու դի է հայտնաբերվել. նրան մահվան հասցնելու մեջ կասկածվում է տղամարդու կրտսեր եղբայրը

ԵՐԵՎԱՆ, 25 հունիսի./Նովոստի–Արմենիա/. Այսօր՝ հունիսի 25-ին, արտակարգ դեպք է տեղի ունեցել Երևանում։

Shamshyan.com–ի հաղորդմամբ, ժամը 12։00-ի սահմաններում Երևանի 1-03 շտապօգնության բժիշկների հերթապահ խումբն ահազանգել է ոստիկանության Մալաթիայի բաժին և հայտնել, որ կանչով մեկնել է Հարավ-Արևմտյան թաղամասի Շերամի 113 շենքի բնակարաններից մեկը, որտեղ հայտնաբերել է տղամարդու դի։

Ոստիկաններն ու քննիչները նշված տանը հայտնաբերել են նույն տան բնակիչ 65-ամյա Աշոտ Հարթենյանի դին։

Փաստի առթիվ հարուցվել է քրեական գործ ՀՀ ՔՕ 112 հոդվածի 2-րդ մասի 14-րդ կետի (առողջությանը ծանր մարմնական վնասվածք պատճառելը, որն անզգուշությամբ առաջացրել է մարդու մահ) հատկանիշներով։

Կայքի տեղեկություններով՝ նշված հանցագործությունը կատարելու կասկածանքով Մալաթիայի ոստիկաններն ու քննիչները տաք հետքերով հայտնաբերել և ոստիկանության Մալաթիայի բաժին են բերման ենթարկել մահացածի 62-ամյա եղբորը։ Նշվում է նաև, որ բնակարանում ամբողջովին տիրում է հակասանիտարական վիճակ։

Կայքի հաղորդմամբ, սպանվածն ու կասկածյալը նախկինում մի քանի անգամ դատապարտված են եղել։–0–