Երկու երիտասարդներ գեղեցկության սրահից մազահեռացման սարք են գողացել

ԵՐԵՎԱՆ, 14 մարտի․/Նովոստի–Արմենիա/․ Մարտի 5-ի ժամը 9.50-ին ՆԳՆ ոստիկանության օպերատիվ կառավարման կենտրոն զանգած քաղաքացին հայտնել էր, որ Արտաշատ քաղաքի Իսակովի փողոցի գեղեցկության սրահից գողություն է կատարվել, հաղորդում է ՀՀ ոստիկանությունը:

Ոստիկանության Արտաշատի բաժնից մեկնած օպերատիվ խումբը պարզել է, որ գեղեցկության սրահի դուռը տեխնիկական միջոցների գործադրմամբ բացելով՝ գողացել են մազահեռացման սարք:

Արարատի մարզային քննչական վարչությունում նախաձեռնվել է քրեական վարույթ:

ՆԳՆ ոստիկանության ՔՈ գլխավոր վարչության ծառայողները ձեռնարկված միջոցառումների արդյունքում օպերատիվ տեղեկություններ են ստացել, որ գողությունը կատարել են արտաշատցի 35 և 22 տարեկան երկու երիտասարդ: Նրանք մարտի 13-ին, ժամը 21.30-ին, Դվին գյուղի սկզբնամասում հայտնաբերվել, ձերբակալվել և, 22-ամյա երիտասարդի վարած «Օպելով» հանդերձ, տեղափոխվել են ոստիկանության Արտաշատի բաժին:
«Օպելի» սրահում՝ հետևի նստելատեղին, հայտնաբերվել է գողացված մազահեռացման սարքը:

Երիտասարդները և կազմված փաստաթղթերը ներկայացվել են Արատարի մարզային քննչական վարչություն, իսկ մեքենան տեղափոխվել է ոստիկանության Արտաշատի բաժնի հատուկ պահպանվող տարածք:

Հանգամանքները պարզվում են:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:-0-