ԵՐԵՎԱՆ, 8 մարտի./Նովոստի–Արմենիա/. Սիրիայում մարդասիրական առաքելություն իրականացնելու ընթացքում նախօրեին՝ մարտի 7-ին, տեղի է ունեցել ականային պատահար, որի ժամանակ հայ մասնագետների խմբի սակրավորներից մեկն աջ ոտնաթաթի վնասվածք է ստացել, հինգշաբթի տեղեկացրել է «Հումանիտար ականազերծման և փորձագիտական կենտրոն»-ը։
«Պատահարի պատճառ է հանդիսացել պլաստիկե իրանով ծուղակ ականը», – նշվում է կենտրոնի Facebook–յան էջում։
Հաղորդվում է նաև, որ վիրավորված ականազերծողը շտապ տեղափոխվել է հոսպիտալ, վիրահատվել է:
«Նրա կյանքին վտանգ չի սպառնում: Ականազերծման աշխատանքները շարունակվում են», – նշվում է հաղորդագրության մեջ։
Հայաստանի պաշտպանության նախարարությունը փետրվարի 8–ին հայտնել է 83 հայ մասնագետներից բաղկացած խմբի` Սիրիայի Հանրապետություն ուղարկելու մասին։ Հայ մասնագետները Հալեպի` բացառապես ռազմական գործողություններից զերծ բնակավայրերում ծավալելու են հումանիտար ականազերծման, բնակչության հակաականային իրազեկման, բժշկական ծառայությունների մատուցման մարդասիրական գործունեություն։ -0-
