ԵՐԵՎԱՆ, 11 մարտի./Նովոստի–Արմենիա/. ՀՀ քննչական կոմիտեի Վայոց ձորի մարզային քննչական վարչությունում շարունակվում է Մալիշկա գյուղի բնակչի նկատմամբ կատարված սպանության փորձի դեպքի առթիվ հարուցված քրեական գործի նախաքննությունը, հաղորդում է ՀՀ ՔԿ մամուլի ծառայությունը:
Ավելի վաղ հայտնել էինք, որ 2021թ. մարտի 8-ին՝ ժամը 13:00-ի սահմաններում, իրեն պատկանող «Վազ-2107» մակնիշի ավտոմեքենայի կցորդիչը բարձրացնելու ժամանակ, կցորդիչի տակ գտնվող նռնակի պայթելու հետևանքով կրծքավանդակի և վերջույթների բազմաթիվ բեկորային վնասվածքներով բժշկական կենտրոն է տեղափոխվել Վայոց ձորի մարզի Մալիշկա գյուղի 61-ամյա բնակիչ:
Նախաքննության ընթացքում իրականացված անհետաձգելի քննչական գործողությունների և ՀՀ ոստիկանության համապատասխան ստորաբաժանման հետ կատարված համատեղ օպերատիվ-հետախուզական միջոցառումների արդյունքում պարզվել են դեպքի՝ էական նշանակություն ունեցող հանգամանքներ՝ շարժառիթը, առերևույթ հանցագործություն կատարած անձի ինքնությունը, որը նույն գյուղի բնակիչ է՝ ծնված 1959թ.», – նշվում է հաղորդագրության մեջ:
Քննությամբ տվյալներ են ձեռք բերվել այն մասին, որ 2021թ. մարտի 7-ին՝ ժամը 20:00-20:30-ի սահմաններում, վերջինս, վրեժի շարժառիթով, անձնական հարցերի պատճառով համագյուղացուն ապօրինաբար կյանքից զրկելու դիտավորությամբ, իր կողմից ապօրինի ձեռք բերված և պահված «ՌԳԴ-5» նռնակի օղը հանելով և այն մարտական վիճակի բերելով, տեղադրել է համագյուղացու ավտոմեքենայի կցորդիչի վրա՝ այն հարմարեցնելով այնպես, որ կցորդիչի աննշան շարժման դեպքում պայթուցիչը գործարկվի, և նռնակը պայթի: Հաջորդ օրը՝ ժամը 13:00-ի սահմաններում, 61-ամյա տղամարդը կցորդիչը շարժել է` ավտոմեքենային միացնելու նպատակով, ինչի հետևանքով նռնակն ընկել ու պայթել է՝ պատճառելով բեկորային բազմաթիվ վնասվածքներ:
Տուժողի համագյուղացին ձերբակալվել է՝ սպանության փորձ կատարելու, ապօրինի կերպով պայթուցիկ սարք ձեռք բերելու, պահելու կասկածանքով, և հարցաքննվել՝ տալով ինքախոստովանական ցուցմունք:
Նախաքննությունը շարունակվում է:
Ձեռնարկվում են միջոցառումներ՝ դեպքի բոլոր հանգամանքները պարզելու, օբյեկտիվ և բազմակողմանի քննություն կատարելու ուղղությամբ:
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
