ԵՐԵՎԱՆ, 17 հուլիսի. /Նովոստի–Արմենիա/. Ազատության հրապարակում ձերբակալվել են ընդդիմադիր քաղաքական ակտիվիստներ Դավիթ Սանասարյանն ու Անդրիաս Ղուկասյանը, հաղորդում են հայկական ԶԼՄ–ները։
Ակտիվիստները փորձել են կազմակերպել ակցիա` մի քանի մարդկանց մասնակցությամբ, սակայն նրանց տեղափոխել են ոստիկանական բաժանմունք։
Այս պահին Ազատության հրապարակում են գտնվում նաև «Ժառանգություն» ընդդիմադիր կուսակցության ներկայացուցիչ Արմեն Մարտիրոսյանն ու նույն կուսակցության խորհրդարանական խմբակցության ղեկավար Զարուհի Փոստանջյանը։
Փոստանջյանը սկսել է վիճել ոստիկանների հետ, ինչից հետո կանգնել է ավտոմեքենայի առաջ և թույլ չի տվել, որպեսզի այն անցնի` նշելով, որ թույլ չի տա, որ ոստիկանությունը տանի նաև մյուսներին։
Ոստիկանները կիրակի Ազատության հրապարակում ապամոնտաժել են «Հիմնադիր խորհրդարան» ընդդիմադիր շարժման պաստառները, որոնց վրա գրված են եղել ռազմատենչ կոչեր։
Կիրակի լուսադեմին մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահում են այնտեղ գտնվող անձանց։ Հարձակման ժամանակ մեկ ոստիկան զոհվել է, չորսը` վիրավորվել։ Որոշ տեղեկություններով` զինված անձինք «Հիմնադիր խորհրդարան» արմատական ընդդիմադիր կազմակերպության կալանավորված առաջնորդ Ժիրայր Սեֆիլյանի կողմնակիցներն են, ովքեր պահանջում են ազատել նրան։ -
0-
Ծանոթացեք լուրերին առաջինն ու քննարկեք դրանք մեր Telegram-յան ալիքում