ԵՐԵՎԱՆ, 30 ապրիլի./Նովոստի–Արմենիա/. Երևանում` COVID-19 սպասարկող բժշկական կենտրոններից մեկում գիշերը դժբախտ պատահար է տեղի ունեցել:
Ինչպես հայտնում է ՀՀ առողջապահության նախարարությունը, 77-ամյա պացիենտը հիվանդասենյակի պատուհանից նետվել է ցած: Տղամարդը ստացիոնարում բուժվել է ապրիլի 17-ից, ում վիճակը գնահատվել է միջին ծանրության:
Հիվանդասենյակում եղել է կնոջ հետ, որը կորոնավիրուսի դեմ ստացիոնար բուժումը ստանում էր նույն բժշկական կենտրոնում:
ԱՆ–ից հայտնում են, որ բուժման ընթացքում որևէ խնդիր չի եղել, տղամարդը կատարել է բժիշկների բոլոր ցուցումները` ստացել պատշաճ բուժօգնություն:
Նրա մոտ հոգեկան շեղումներ մասնագետները չեն արձանագրել:
Դեպքի վայրում աշխատում է ոստիկանությունը հանգամանքները պարզելու համար:
ԱՆ–ից նշում են, որ ուսումնասիրությունների համաձայն, կորոնավիրուսային հիվանդությունը լուրջ ազդեցություն է ունենում COVID-19-ով պացիենտների հոգեկան առողջության վրա: Հատկապես խոցելի են դառնում այն պացիենտները, որոնց մոտ արդեն իսկ գրանցված են լինում առողջական նման խնդիրներ:
Հիշեցնենք, որ նմանատիպ դեպք էր գրանցվել ապրիլի 7–ին։ ԱՆ–ից
հայտնել էին, որ Երևանում` COVID-19 սպասարկող բժշկական կենտրոններից մեկում 72-ամյա պացիենտներից մեկը հիվանդասենյակի պատուհանից նետվել է ցած:–0–