ԵՐԵՎԱՆ, 22 ապրիլի․/Նովոստի–Արմենիա/․ Հայաստանն այս տարի փորձել է ներկայացնել նոր ձևաչափ «Եվրատեսիլ» երգի մրցույթում, որով երբեք չի ներկայացել։
Այս մասին ասաց «Եվրատեսիլ 2024» երգի մրցույթում Հայաստանի պատվիրակության ղեկավար Դավիթ Ծերունյանն ասուլիսի ժամանակ։
«Այս առումով LADANIVA խումբը լավագույն ընտրությունն է, որովհետև այս տարի մրցույթի կարգախոսն է «United by music», այսինքն միավորված ենք բոլորս երաժշտության միջոցով, և LADANIVA–ն շատ համահունչ է այս կարգախոսին», – ասաց Ծերունյանը։
LADANIVA խմբի մեներգչուհի Ժակլին Բաղդասարյանն իր հերթին նշեց, որ երգն ընտրվել է խմբի և Առաջին ալիքի ընտրությամբ։
«Մենք կարծում ենք, որ երգը շատ ուրախ է, պարային, լավ տրամադրություն ու մեսիջ է պարունակում։ Ինչպես գիտեք, մեր խումբը միախառնում է տարբեր երկրների մշակույթներ։ Մենք միախառնել ենք հայկական, արևելյան, աֆրիկյան երաժշտությունը, և մեզ այդպես են ճանաչել», – ասաց Բաղղասարյանը։
Նա ավելացրեց, որ շարունակում են միախառնել տարբեր մշակույթներ, որովհետև կարծում են, որ երաժշտության և արվեստի մեջ պետք չէ սահմաններ դնել։
Ասուլիսի ժամանակ Ծատուրյանը հայտնեց, որ այսօր Ժակլինի ծննդյան օրն է, ինչից հետո ներս բերվեց ծննդյան տորթը և Ժակլինը փչեց մոմերը։
LADANIVA խումբը Հայաստանը «Եվրատեսիլ 2024»–ում կներկայացնի JAKO երգով։ Մրցույթն այս տարի տեղի կունենա Շվեդիայի Մալմյո քաղաքում մայիսի 7-ին (առաջին կիսաեզրափակիչ), մայիսի 9-ին (երկրորդ կիսաեզրափակիչ) և մայիսի 11-ին (եզրափակիչ): Հայաստանը ելույթ կունենա երկրորդ կիսաեզրափակչում։–0–
