ԵՐԵՎԱՆ, 11 սեպտեմբերի./Նովոստի–Արմենիա/. Հայաստանի վարչապետ Նիկոլ Փաշինյանը պատասխանեց «Բարգավաճ Հայաստան» խմբակցության պատգամավոր Միքայել Մելքումյանի` Մեղրի ԱՏԳ–ի շահագործման հետ կապված հարցին։
«Անցյալ տարի ես այցելեցի Մեղրի, և պարզվեց, որ ազատ տնտեսական գոտին հողատարածք չունի։ Նախկին բարձրաստիճան պաշտոնյաները շատ արագ սեփականաշնորհել են շրջակա ամբողջ տարածքը, երբ տեղեկացել են, որ այդտեղ լինելու է ԱՏԳ։ Հարուցվել է քրեական գործ, որ սեփականաշնորհումն անօրինական ճանաչվի։ Ներկայում դատական վարույթ է իրականացվում»,– ասաց Փաշինյանը։
Ինչ վերաբերում է սահմանապահ ուղեկալին, ապա այդ հարցը հայ–իրանական հանձնաժողովի քննարկման հարց է։
«Դուք գիտեք, որ Մեղրու անցակետի արդիականացման շատ խոշոր ծրագիր կա։ Մեր հաշվարկներով, այն հնարավոր կլինի իրականացնել 2023 թվականին։ Մինչ այդ մենք հողերը կվերադարձնենք։ Ինչ վերաբերում է շինարարության գներին, ապա այնտեղ կան նաև տարաձայնություններ։ Շինարարը կարծում է, որ ինքն ավելի շատ պիտի ստանա, իսկ նախագիծն իրականակում այլ է եղել։ Մենք կփորձենք լուծել նաև այդ հարցը»,– ասաց Փաշինյանը։
Ինչպես հաղորդվել է ավելի վաղ, Մեղրիի ԱՏԳ կառուցման ընդհանուր արժեքը կազմում է 32 մլն դոլար, որից 28 մլն դոլարը` կապիտալ ծախսեր։ Դա Տնտեսական զարգացման և ներդրումների նախարարության գերակա ներդրումային ծրագրերից մեկն էր, որը նախատեսել է 10–15 հա մակերեսով ԱՏԳ ստեղծում` մինչև 45-50 հա ընդլայնվելու հնարավորությամբ։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում