ԵՐԵՎԱՆ, 23 մայիսի. /Նովոստի-Արմենիա/. Հայաստանում է գտնվում շվեյցարացի լրագրողների 20 մարդուց բաղկացած խումբը` հանրապետության տուրիստական գրավչությունը ֆրանսիացի զբոսաշրջիկների համար ուսումնասիրելու նպատակով:
Հինգշաբթի Երևանում նրանք մասնակցել են Շվեյցարիայի թրեվել լրագրողների ասոցիացիայի ժողովին։
Ինչպես լրագրողների հետ զրույցում հայտնեց Շվեյցարիայում ՀՀ առևտրային ներկայացուցիչը Հայկ Հովհաննիսյանը, նման միջոցառման անցկացումը թույլ կտա նոր ազդակ հաղորդել Հայաստանի միջազգային զբոսաշրջային հեղինակությանը, մասնավորապես, ֆրանսալեզու երկրների շարքում:
«Շվեյցարացիները շատ են ճանապարհորդում` կատարելով տարեկան միջինը 15 մլն այցելություններ` 10-12 օր տևողությամբ: Ընդհանուր առմամբ, շվեյցարացիների գրեթե 5 մլն այցելություններ կատարվում են դեպի Արևելյան Եվրոպայի և Արևմտյան Ասիայի երկրներ: Եվ այստեղ կա մի լուրջ հատված, որն անհրաժեշտ է զբաղեցնել», - ասաց նա:
Ըստ առևտրային ներկայացուցչի, Շվեյցարիայի զբոսաշրջային շուկան բավականին մեծ նշանակություն ունի Հայաստանի համար, քանի որ շվեյցարացի զբոսաշրջիկներին գրավում են ոչ թե ծովը կամ հանգստյան վայրերը, այլ երկրի արտասովորությունը և նրա յուրահատկությունը:
«Շվեյցարացի տուրիստները յուրահատուկ ճաշակ ունեն: Նրանց չես զարմացնի շքեղ լողափներով կամ հյուրանոցներով, նրանք տեսել են այդ ամենը: Նրանց հետաքրքրում են բացառիկ երկրները, որտեղ կկարողանան տուրիստական հեծանվավազք, արշավներ դեպի լեռներ կազմակերպել», - ասաց նա:
Հովհաննիսյանն ավելացրեց, որ միջին և բարձր տարիքի զբոսաշրջիկներին հետաքրքրում են ինչպես պատմաճարտարապետական հուշարձանները, այնպես էլ քրիստոնեական ժառանգությունը:
Ֆրանսալեզու մամուլի միջազգային միության ներկայացուցիչ Ալեքս Դեքոտը նշեց իր հերթին, որ Հայաստանն ունի բոլոր հնարավորություններն շվեյցարացի զբոսաշրջիկների ներգրավման և, առաջին հերթին, հակակշիռ ունի հնի և ներկայի միջև:
«Նախատեսում եմ մինչև աշուն ֆիլմ նկարահանել Հայաստանի մասին, որտեղ Մատենադարանը և Թումոն կարտացոլեն կապն անցյալի և ներկայի միջև: Մենք կներկայացնենք Հայաստանը որպես երկիր, որը խիղճ և հոգի ունի: Ձեր երկիրը արժանի է սիրված լինել», - ասաց նա:
Շվեյցարիայի թրեվել լրագրողների ասոցիացիայի ժողովն անցկացվում է Երևանում Շվեյցարիայում Հայաստանի առևտրային ներկայացուցչության նախաձեռնությամբ և ՀՀ տնտեսական զարգացման և ներդրումների նախարարությանն առընթեր Զբոսաշրջության պետական կոմիտեի նախաձեռնությամբ:
Նախատեսվում է, որ լրագրողները կանցկացնեն Հայաստանում 5 օր, ինչի ընթացքում փոքր խմբերով կայցելեն հանրապետության առանցքային զբոսաշրջային կենտրոններ տարբեր ուղղություններով:-0-