ԵՐԵՎԱՆ, 30 հոկտեմբերի. /Նովոստի–Արմենիա/. Երկուշաբթի խորհրդարանական հանձնաժողովներում մեկնարկել են ՀՀ 2018 թ.–ի պետական բյուջեի նախագծի քննարկումները։ Երկու շաբաթվա ընթացքում պատգամավորները պրոֆիլային հանձնաժողովներում կքննարկեն երկրի հիմնական ֆինանսական փաստաթղթի բոլոր դրույթները, կներկայացնեն առաջարկներ, որոնք կքննարկվեն խորհրդարանական նստաշրջանի ընթացքում։
Վարչապետ Կարեն Կարապետյանը ներկայացրեց երկրի գլխավոր ֆինանսական փաստաթղթի 2018 թ.–ի հիմնական նպատակները։
«Հաշվի առնելով ՀՀ կառավարության հնգամյա ծրագրի նպատակադրումները՝ 2018թ.-ի բյուջեում հարկաբյուջետային քաղաքականության մոտեցումների մեջ փոփոխություններ ենք կատարել: Միջնաժամկետ հորիզոնում` չնայած հարկաբյուջետային քաղաքականությունը շարունակելու է սահմանափակված մնալ պարտքի կայունության ապահովման անհրաժեշտությամբ, այնուամենայնիվ, հարկաբյուջետային քաղաքականությունն իրականացվելու է ծախսային կառուցվածքի վերանայմամբ՝ առավել շեշտադրելով կապիտալ ծախսերի իրականացման անհրաժեշտությունը տնտեսական աճի կայունության ապահովման հարցում», – ասաց Կարապետյանը։
Նա ձեռնպահ մնաց կոնկրետ ցուցանիշների ներկայացումից` ընդգծելով, որ դրանք մանրակրկիտ կքննարկվեն հանձնաժողովներում և շեշտադրեց մի քանի դրույթներ, որոնք ընկած են 2018 թ.–ի պետբյուջեի նախագծի հիմքում։
Վարչապետն ընդգծեց, որ վերջին մի քանի տարիներին ՀՀ տնտեսությունը բնութագրվում է արտաքինից ներթափանցող բացասական ցնցումներով, ինչի հետևանքով գրանցվել է տնտեսական աճի ցածր մակարդակ`նվազեցնելով տնտեսական աճի ներուժը:
«Չնայած ընթացիկ զարգացումները հուսադրող են, տնտեսական աճի հիմքերը դեռևս բավարար ամուր չեն երկարաժամկետ բարձր տնտեսական աճին հավակնելու համար»,-ասաց Կարապետյանը։
Նրա խոսքով, այս տարի ծրագրվել է այնպիսի հարկաբյուջետային քաղաքականություն, որը կնախորոշի հետագա տնտեսական զարգացումների մեկնարկը:
«Առաջարկվող հարկաբյուջետային քաղաքականությունը հիմքեր կստեղծի ապագայի համար`ապահովելով միջինը 5%-անոց տնտեսական աճ, ինչն էլ հնարավորություն կտա ավելի արդյունավետ լուծել մեր առջև ծառացած խնդիրները`թե՛ կայուն երկարաժամկետ զարգացման առումով, թե՛ սոցիալական բնույթով», – ընդգծեց ՀՀ վարչապետը։
Ներկայացնելով ծախսային քաղաքականությունը` վարչապետը նշեց, որ այն հիմնված է հստակ սկզբունքների վրա, որոնց հիմքում են տնտեսական աճը, երկրի անվտանգությունն ու սոցիալական ուղղվածությունը, ինչը երաշխավորում է երկրի գրավչության բարձրացում, ձևավորում է ամուր հիմքեր կայուն, երկարաժամկետ ու անվտանգ զարգացման համար։
«Եկամտային քաղաքականությունը լինելու է հավասարակշռված թե՛ ստվերային տնտեսության կրճատման, թե՛ գործարար միջավայրի բարելավման տեսանկյունից: Այստեղ կարևոր է եկամուտների արդյունավետ համակարգի հիմքերի ձևավորում, ինչը կապահովի հարկային մուտքերի կայուն աճ` ՀՆԱ–ի նկատմամբ, ինչպես նախատեսված է կառավարության ծրագրով», – ասաց Կարապետյանը։
ՀՀ կառավարությունը սեպտեմբերի 28–ի նիստի ժամանակ հավանություն է տվել 2018 թ.–ի պետբյուջեի նախագծին։ 2018 թ.–ի պետբյուջեի եկամուտների համախառն ծավալը նախատսված է 1 տրիլիոն 307 մլրդ դրամի չափով, ծախսերը` 1 տրիլիոն 464,2 մլրդ դրամ։ Պակասուրդը նախատեսված է 156,8 մլրդ դրամի չափով ($1 - 482,24 դրամ)։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
