ԵՐԵՎԱՆ, 1 հունիսի. /Նովոստի-Արմենիա/. Շվեյցարիայում տեղի կունենա Գոտարդի թունելի հանդիսավոր բացումը, որի կառուցման վրա ծախսվել է 17 տարի և 11 մլրդ եվրո: Այս երկաթուղային թունելը, որն աշխարհում ամենաերկարն ու ամենախորն է, անցնում է Ալպերի սրտով և Եվրոպայի միջև ուղևորությունները կդարձնի ավելի արագ:
Գոտարդի բազիսային թունելի շինարարությունը սկսվել է 17 տարի առաջ, երբ Ալպերի միջով Շվեյցարիայից Իտալիա կարելի էր հասնել մի քանի ժամվա ընթացքում հին Գոտարդի երկաթուղային թունելի միջոցով (15 կմ) կամ Գոտարդի մեքենաների համար նախատեսված թունելի միջոցով (16,5 կմ): Բայց այս թունելներն այլևս չէին կարողանում հաղթահարել փոխադրումների և տրանսպորտի ծավալը: Նոր թունելի շինարարության աշխատանքները, որը պետք է լուծեր գերծանրաբեռնվածության խնդիրը, բոլոր 17 տարիների ընթացքում իրականացվում էին կլոր տարի և շուրջօրյա։
Չորեքշաբթի Շվեյցարիան գործարկել է Գոտարդի բազիսային թունելը, որով ճանապարհը գերձայնային գնացքով կազմում է ընդամենը 17 րոպե` էլ ավելի մոտեցնելով միմյանց Եվրոպայի երկրները: Օրինակ, Ցյուրիխից Միլան գետնի վրայով, և գետնի տակով կարելի է հասնել երեք ժամում, հաղորդում է
Կոմերսանտը:
Գոտարդի բազիսային թունելն աշխարհում ամենաերկար և ամենախորը երկաթուղային թունելն է: Նրա երկարությունը 57 կմ-ից ավել է, այն անցնում է լեռների միջով 2,3 կմ խորության վրա: Թունելում առկա է երկու երկաթգիծ, որոնցով գնացքները շարժվելու են հակառակ ուղղություններով, ինչը թույլ կտա օրվա մեջ թունելով երթևեկել մոտ 260 բեռնատարի և 65 ուղևորափոխադրող գնացքի:
Թունելի բացման արարողությանը Շվեյցարիայի տրանսպորտի նախարար Դորիս Լեյտհարդն ընդգծել է, որ թունելը խորհրդանշում է այն, թե ինչ կարող են անել շվեյցարական ինժեներները և Եվրոպան:
Արտասահմանյան ԶԼՄ-ների գնահատականով, Գոտարդի թունելի գործարկմանը նվիրված միջոցառումների վրա Շվեյցարիան ծախսել է մոտ 8 մլն եվրո: -0-
