Մեդվեդևը հիշել է Սահակաշվիլուն և խոստացել ցանկացած ագրեսորի «ատամները փշրել»
ՌԴ նախագահ Դմիտրի Մեդվեդևը նախազգուշացրել է, որ Ռուսաստանը միշտ պատրաստ է հակահարված տալ իր քաղաքացիների նկատմամբ ոտնձգությունների դեպքում:
Հինգշաբթի երիտասարդության հետ երկրի ղեկավարի հանդիպման մասնակիցներից մեկը՝ մոսկվացի անհատ ձեռներեց Գեորգի Օվակիմովը պատմեց իր բազմազգ ընտանիքի պատմությունը և շնորհակալություն հայտնեց Մեդվեդևին, որ նա «փշրեց» 2008 թվականի օգոստոսին պատերազմ ծավալած Վրաստանի նախագահ Միխայիլ Սահակաշվիլու «ատամները»:
«Հենց փորձեն խցկվել, ատամները կփշրենք»,- նշեց Մեդվեդևը, հաղորդում է ՌԻԱ Նովոստին:
«Այն, ինչ տեղի է ունենում միութենական նախկին հանրապետություններում, ինձ պարզապես շշմեցնում է»,- խոստովանեց նախագահը: «Ես կարդում եմ այնտեղից եկած նյութերը, հատուկ ծառայությունների պատրաստած նյութերը, տարբեր գաղտնագրեր` կարդում ես, և աներևակայելի է, թե ինչպես կարելի է սեփական ժողովրդին այդ աստիճան հակադրել այլ քաղաքացիների»,- ավելացրեց նա:
Նրա խոսքով` արդյունքում դա հանգեցրել է «բնակչության հսկայական արտահոսքի»: Ռուս առաջնորդի կարծիքով` նախկին միութենական հանրապետությունների ղեկավարության նմանատիպ վարքը «ազգային խաղաքարտի հանցավոր օգտագործման օրինակ է»:
Մեդվեդևը միաժամանակ նշեց, որ Վրաստանում «դիմակայությունը սառը փուլից վերածվել է բաց պատերազմի»: «Նա, ով այսպես է վարվում, տհաճություններ կունենա»,- դահլիճի ծափահարույթունների ներքո խոստացավ Մեդվեդևը:
Օգոստոսի 8-ի գիշերը վրացական զորքը հարձակվել էր Հարավային Օսեթիայի վրա և ավերել մայրաքաղաք Ցխինվալիի մի մասը։ Ռուսաստանը, պաշտպանելով խաղաղ բնակիչներին, որոնցից շատերն ընդունել էին ՌԴ քաղաքացիություն, զորք էր մտցրել հանրապետություն և հինգ օր տևած ռազմական գործողություններից հետո դուրս էր հանել վրացական զինվորականներին տարածաշրջանից: 2008թ. օգոստոսի վերջին Ռուսաստանը ճանաչեց Հարավային Օսեթիայի և Աբխազիայի անկախությունը:--0—
