Հայերի դերն Ուկրաինայում կքննարկվի Ղրիմի միջազգային գիտաժողովում

«Ուկրաինայի հայեր. երեկ, այսօր, վաղը» միջազգային չորրորդ գիտաժողովը կկայանա 2011 թվականի սեպտեմբերի 24-25-ը Սիմֆերոպոլում, Ռուսաստանի հայերի «Երկրամաս» թերթի տեղեկատվական կենտրոնին են հայտնել գիտաժողովի կազմկոմիտեից։

Գիտաժողովի շրջանակներում, որն անցկացնում է Ուկրաինահայերի միությանն առընթեր Հայագիտության կենտրոնը, նախատեսված են հետևյալ թեմաները՝ «Հայ-ուկրաինական կապերն անտիկ ժամանակներից մինչև մեր օրերը», «Ղրիմի և Ուկրաինայի այլ շրջանների հայկական միջնադարյան բնակավայրերի պատմություն», «Ղրիմի և Ուկրաինայի այլ շրջանների հայկական միջնադարյան բնակավայրերի պատմությունը XVIII –XX դդ սկզբին», «Ղրիմի և Ուկրաինայի այլ շրջանների Հայկական եկեղեցու պատմություն», «Ղրիմի հայերի տեղափոխումն Ազովի նահանգ», «Ուկրաինահայերի մշակույթը միջնադարից մինչև մեր օրերը», «Հայերն ՈՒԽՍՀ-ում», «Հայաստան-Ուկրաինա. մշակութային երկխոսություն»։

Միջոցառումը կանդրադառնա նաև Ուկրաինայի հայկական կրթական հաստատությունների, բարեգործական միությունների գործունեությանը, երկու երկրների միջև առկա դիվանագիտական կապերի հարցերին, ինչպես նաև Հայաստանում ուկրաինացիների կյանքին։ Նախատեսվում է նաև հետևյալ բաժինների աշխատանքը՝ «Հին աշխարհի և միջին դարերի պատմություն» և «Նոր և նորագույն պատմություն»։

Գիտաժողովի աշխատանքային լեզուներն են՝ ռուսերեն, ուկրաիներեն, հայերեն և անգլերեն։ Միջոցառման արդյունքում կկազմվի գիտական հոդվածների ժողովածու։ -0-