ԵՐԵՎԱՆ, 27 մայիսի. /Նովոստի-Արմենիա/. Բելառուսի նախագահ Ալեքսանդր Լուկաշենկոն դիմել է բնակչությանը դադարեցնել իրարանցումը սպառողական շուկայում, հաղորդում է ՌԻԱ Նովոստին։
«Դադարեցրեք բնակարաններում, ավտոտնակներում, նկուղներում պահեստների ստեղծումը, առավել ևս, որ այն ապրանքները, որոնք դուք ձեռք եք բերում խանութներում, մեզ մոտ բավարար քանակության են»,- ուրբաթ օրը տնտեսության հարցերով խորհրդակցության ընթացքում ասել է Լուկաշենկոն։
Ըստ նրա, այսօր կառավարությունը կարող է ապահովել այնքան, որքան անհրաժեշտ է ամեն օրվա համար։
«Մեկ կիլոգրամ միս է պետք՝ գնեք, հինգ է պետք՝ հինգը գնեք, բայց պետք չէ 10 կիլոգրամ գնել։ Մենք չենք հասցնում երկու օրվա ընթացքում խանութներ մատակարարել երեք անգամ ավելի, քան երեկ էր, այդքան ուժ չունենք»,- ասել է Լուկաշենկոն։
«Հանգստացեք, գներն այլևս տեղ չունեն աճելու, դրանք այնպես էլ արդեն ծայրահեղության են հասել»,- հանգստացրել է ժողովրդին բելառուս նախագահը։
Ըստ նրա, ինքն առաջին անգամ ամաչել է բելառուս ժողովրդի փոխարեն, երբ Ղազախստանում է եղել (մայիսի 23-25)։
«Ես ժամանեցի, իսկ ինձ բոլորը հարցնում են՝ ինչ է պատահել։ Ռուսները ցույց են տալիս խանութների դատարկ դարակները»,- պարզաբանել է Լուկաշենկոն։
«Ես առաջին անգամ ամաչեցի իմ երկարամյա նախագահական աշխատանքի ընթացքում այդ իրարանցումը ստեղծած մարդկանց համար»,- ասել է նա։
«Մեզ ընկալում են որպես վայրենիների, իսկ նրանք էլ (ռուսական ԶԼՄ-ները) հատուկ չափազանցնում են դա»,- կարծում է Լուկաշենկոն։
Նա ասել է, որ հպարտ է եղել բելառուսների համար մետրոյի ողբերգության ժամանակ, երբ բոլորն օգնում էին միմյանց։ «Ես հպարտ էի, որ այսպիսի ժողովուրդ ենք, որ կարող է ռիսկի գնալ՝ չմտածելով, որ կարող է երկրորդ-երրորդ պայթյունը լինել»,- ասել է Լուկաշենկոն։
Նախագահը հայտնեց, որ աղքատ կենսաթոշակառուներին և ուսանողներին պետությունը կաջակցի, և նա արդեն կենսաթոշակների բարձրացման հրամանագիր է ստորագրել։ -0
