Մանանա Ասլամազյանը, ում «մոռացել էին» «ՏԷՖԻ» մրցանակաբաշխության ժամանակ, մրցանակը կստանա նոյեմբերի 17-ին

ԵՐԵՎԱՆ, 15 նոյեմբերի. /Նովոստի-Արմենիա/. Ռուսական հեռուստատեսության զարգացման գործում  անձնական ներդրման համար «ՏԷՖԻ 2010» մրցանակը կհանձնվի չորեքշաբթի՝ նոյեմբերի 17-ին, Մանանա Ասլամազյանին, ում անունը ՌՀԱ վարչությունը  սխալմամբ չի հնչեցրել սեպտեմբերի հանդիսավոր արարողության ժամանակ, հաղորդում է «Ռուսական հեռուստատեսության ակադեմիա» հիմնադրամի մամուլի ծառայությունը (ՌՀԱ), որը ազգային հեռուստատեսային մրցույթ է կազմակերպում, հաղորդում է «ՌԻԱ Նովոստին»։

Սեպտեմբերի 25-ին Սանկտ Պետերբուրգում անցկացվել է «ՏԷՖԻ 2010» մրցանակի դափնեկիրների պարգևատրման հանդիսավոր արարողությունը՝ «Դեմքեր» կատեգորիայում։ Ասլամազյանի անունը, որին հատուկ մրցանակ է շնորհվել, բեմից չի հնչեցվել։ Այդ միջադեպը մեծ հասարակական արձագանք է առաջացրել։ Ավելի ուշ հայտարարություն է տարածվել, որտեղ ՌՀԱ վարչությունը սխալմունք է համարել արարողության ժամանակ Ասլամազյանի անունը չհիշատակելը։

«2010թ.-ի նոյեմբերի տասնյոթին տեղի կունենա «ՏԷՖԻ-2010» մրցանակաբաշխությունը՝ «Ռուսական հեռուստատեսության զարգացման գործում» Մանանա Ասլամազյանի անձնական ներդրման համար, ով կարևոր դեր է խաղացել տարածաշրջանային հեռուստատեսության կադրերի պատրաստման գործում։ Մրցանակը կհանձնի «ՌՀԱ» հիմնադրամի նախագահ Միխայիլ Շվիդկոյը»,- նշվում է հաղորդագրության մեջ։

Միջոցառմանը կմասնակցեն Ասլամազյանի գործընկերները, ընկերները և աշակերտները՝ Ռուսական հեռուստատեսության ակադեմիայի անդամները, երկրի հայտնի հեռուստալրագրողները։

Ավելի վաղ «Կոմերսանտին» տրված հարցազրույցում Շվիդկոյը հայտարարել էր, որ հաղթողի անունը չի հնչեցվել, քանի որ Ասլամազյանը մրցանակաբաշխությանը ներկա չի եղել, իսկ դափնեկրին հայտարարելը, ով չի կարող բեմ դուրս գալ, «լրացուցիչ խնդիրներ կստեղծեր գործընկեր հեռարձակող՝ «Հինգերորդ ալիքին» համար, որը հեռարձակում է ՏԷՖԻ արարողությունը։ Ըստ նրա՝ այդ որոշման մեջ ոչ մի քաղաքական երանգ չի եղել։

Ասլամազյանը 2001թ.-ից ակադեմիայի անդամ է, նա ղեկավարել է «Ինտերնյուս» ինքնավար ոչ կոմերցիոն կազմակերպությունը, «Կրթված լրատվամիջոցներ» հիմնադրամը։ -0-