Ղրղզստանի փխրուն կայունությունը ցանկացած ժամանակ կարող է խախտվել. Նազարբաև
Ղազախստանի նախագահ Նուրսուլթան Նազարբաևը կարծում է, որ դեռ վաղ է խոսել Ղրղզստանի կայունության մասին, հաղորդում է ՌԻԱ Նովոստին:
«Ղրղզստանում տեղի ունեցած հանրաքվեն, որը հաստատել է նոր սահմանադրությունն ու անցումային շրջանի նախագահին, պատասխան է տվել հարցերի միայն փոքր շրջանակին: Ղրղզստանի փխրուն կայունությունը կարող է խախտվել ցանկացած ժամանակ», - ասել է նա շաբաթ օրը Ալմաթիում ԵԱՀԿ երկրների արտգործնախարարների ոչ պաշտոնական հանդիպման ժամանակ:
Ավելին, Ղազախստանի նախագահի խոսքերով՝ Ղրղզստանում հասունացել է քաղաքական պայքարի սրման պատասխանատու պահը հանրապետության խորհրդարանական ընտրությունների կապակցությամբ:
«Ղրղզստանի ժողովուրդն այս փուլում պետք է լրջորեն մտածի սեփական երկրի հեռանկարների մասին», - ասել է Նազարբաևը:
Նրա խոսքերով՝ ընտրությունների միջոցով Ղրղզստանի քաղաքացիները պետք է ստեղծեն այնպիսի իշխանություն, որը չի կրկնի նախորդների սխալները և տնտեսական ու սոցիալական ոլորտներում անհրաժեշտ բարեփոխումների իրականացում կապահովի:
Նազարբաևը նաև վստահություն է հայտնել, որ Ղրղզստանում երկու քաղաքական հեղաշրջումների գլխավոր պատճառներն էին ոչ զարգացած տնտեսությունը, բնակչության աղքատությունը, իշխանական ուղղաձգության թուլությունը և անկախության ու պետականության կայացման ժամանակահատվածում ժողովրդավարական ինստիտուտների անկայունությունը:-0-
