Մոսկվայում կայանալիք Հաղթանակի շքերթի օտարերկրյա մասնակիցները հրավիրված են Կրեմլի գալա-համերգին

ԵՐԵՎԱՆ, 4 մայիսի. /Նովոստի-Արմենիա/. Մոսկվայում մայիսի 9-ին կայանալիք Հաղթանակի շքերթի օտարերկրյա զինվորական մասնակիցները Վոլոկոլամսկու մոտ ծաղիկներ կդնեն զոհված հերոս պանֆիլովցիների հուշարձանին և ներկա կգտնվեն գալա-համերգներին, որոնք կանցկացվեն Կրեմլի պետական դղյակում և Լուժնիկիի «Ռոսիա» համերգասրահում, ասվում է երեքշաբթի «ՌԻԱ Նովոստի» ստացված ՌԴ պաշտպանության նախարարության մամուլի և տեղեկատվության վարչության հաղորդագրության մեջ:

Տասներեք երկրների զինծառայողներ են ժամանել Մոսկվա՝ Հաղթանակի շքերթին մասնակցելու նպատակով: Մայիսի 9-ին Կարմիր հրապարակով կանցնեն Մեծ Բրիտանիայի, ԱՄՆ-ի, Ֆրանսիայի, Լեհաստանի, Ադրբեջանի, Հայաստանի, Բելառուսի, Ղազախստանի, Ղրղզստանի, Մոլդովայի, Տաջիկստանի, Թուրքմենստանի և Ուկրաինայի զինվորականները:

Շքերթի մասնակիցները ներկա կլինեն Կրեմլի պետական դղյակում և Լուժնիկիում կայանալիք տոնական գալա-համերգներին, ասվում է տեղեկատվության մեջ:

Շքերթի եզրափակիչ մասում Կարմիր հրապարակով կանցնեն ԱՄՆ-ի (ռազմածովային ուժեր), Մեծ Բրիտանիայի (ռազմաօդային ուժեր), Ֆրանսիայի (ցամաքային զորքեր) և Ռուսաստանի զինվորական նվագախմբերը: Այս օրերին Մոսկվայում տեղի կունենա «Ձոն խաղաղությանը» զինվորական նվագախմբերի փառատոնը, որին կմասնակցեն նաև Ուկրաինայի և, ըստ համաձայնության, Չինաստանի երաժիշտները:

ՌԴ պաշտպանության նախարարության տվյալներով՝ ընդհանուր առմամբ ամեն պետությունից շքերթին կմասնակցի 75-ական զինծառայող:-0-