Լուկաշենկոն խոստանում է չփոխանցել իշխանությունն իր զավակներին

Բելառուսի նախագահ Ալեքսանդր Լուկաշենկոն չի ցանկանում, որ իր զավակները նախագահ դառնան և հավաստում է, որ ժառանգաբար իշխանության փոխանցում երկրում չի լինի:

«Ես կատեգորիկ կերպով դեմ կլինեմ, որպեսզի իմ զավակներն ինձանից հետո դառնան նախագահ: Նրանք «կշտացել» են հայրական նախագահությամբ: Այդ պատճառով հանդարտվեք և հանգստացրեք մյուսներին, հատկապես Լիտվայում, քանի որ Բելառուսում ժառանգաբար իշխանության փոխանցում չի լինի»,  - չորեքշաբթի ԲԵԼՏԱ գործակալությունը մեջբերում է Լիտվայի ԶԼՄ-ներին տված Լուկաշենկոյի հարցազրույցը:

Խոսելով իր կրտսեր որդի Նիկոլայի մասին՝ Բելառուսի նախագահը չի բացառել, որ ապագայում նա կարող է Բելառուսի նախագահ դառնալ, ինչպես երկրի 35-ամյա յուրաքանչյուր քաղաքացի: «Եթե ժողովուրդը նրան ընտրի, ապա ինչու՞ ոչ: Ի՞նչ է, նա չի՞ կարող նախագահ լինել: Ապրիորի չենք կարող դա ասել: Անգամ ավելին կասեմ՝ նույնիսկ Ձեր տղան կարող է Բելառուսի նախագահը լինել, եթե հանկարծ ստանա Բելառուսի քաղաքացիություն, Դուք ի՞նչ է, դա կժխտե՞ք....Մեզ մոտ 35-ամյա յուրաքանչյուր քաղաքացի կարող է առաջադրել իր թեկնածությունը, և վերջ: Եվ սրա ետևում դուք ոչինչ չպետք է տեսնեք», - ընդգծել է Լուկաշենկոն:

Բելառուսի նախագահն առաջին անգամ հրապարակային տեղեկացրել է երրորդ որդու գոյության մասին 2007 թ.-ին: Մինչ այդ հայտնի էր միայն երկու որդիների գոյության մասին:

«Ես ավելի մեծ տարիքի երեխաներ ունեմ: Նրանց երբեք չէի ցանկանա ինձանից հետո նախագահ տեսնել: Ավելին, նրանք չեն լինի նախագահ ինձանից հետո: Կարող եք հանգիստ լինել», - եզրափակել է Բելառուսի նախագահը:-0-