Ոչ մի վրացի իրեն թույլ չի տա հրաժարվել ռուսական մշակույթից. Կիկաբիձե

ԵՐԵՎԱՆ, 4 դեկտեմբերի. /Նովոստի-Արմենիա/. Ոչ մի վրացի իրեն թույլ չի տա հրաժարվել ռուսական մշակույթից, հայտարարեց հայտնի վրացի երգիչ և դերասան Վախթանգ Կիկաբիձեն։

«Երբ ես խոսում եմ ռուսական մշակույթի մասին, ապա միշտ նկատի ունեմ Տուրգենևին, Տոլստոյին,Պուշկինին, Չեխովին, Չայկովսկուն։ Ոչ մի վրացի թույլ չի տա ոչ իրեն, ոչ իր թոռներին և ծոռներին հրաժարվել այդ հսկաներից»,- ասել է Կիկաբիձեն «Նովոստի-Արմենիա» գործակալությանը՝ «Անկախ լրատվամիջոցները քաղաքացիական ինտեգրման համար» նախագծի շրջանակներում կազմակերպված օն-լայն հարցազրույցի ժամանակ։

Ըստ նրա, նախկինում մշտապես անցկացվում էին Վրացական մշակույթի օրեր Մոսկվայում և Ռուսական մշակույթի օրեր Վրաստանում։ Կիկաբիձեի կարծիքով, նրանում, որ դա տեղի չի ունենում ներկայումս, «մեղավոր են ռուս քաղաքական գործիչները»։

«Սահակաշվիլին միշտ ընդգծել է այն, որ Վրաստանը ցանկանում է բարեկամություն անել Ռուսաստանի հետ, բայց չգիտես ինչու քաղաքական պատճառներով վրացուն այժմ Ռուսաստանի թշնամու կերպար են դարձրել»,- ասել է Կիկաբիձեն։

«Անկախ լրատվամիջոցները քաղաքացիական ինտեգրման համար» նախագծին աջակցում է ԵՄ-ն, այն իրականացնում են Խաղաղության, ժողովրդավարության և զարգացման կովկասյան ինստիտուտը, Հետաքննող-լրագրողների «Ռեգիոն» հետազոտական կենտրոնը (Հայաստան) և Լրագրողների պաշտպանության «ՌՈՒԽ» կոմիտեն (Ադրբեջան)։-0-