ԱՊՀ երկրների մտավորականության համաժողովը կանցկացվի Տաջիկստանում
ԱՊՀ մասնակից-երկրների գիտական և ստեղծագործական մտավորականության երրորդ համաժողովը կանցկացվի սեպտեմբերի 17-19-ը Տաջիկստանում, հաղորդում է «ՌՒԱ Նովոստին»։
Ինչպես տեղեկացրել է ԱԳՆ տեղեկատվության դեպարտամենտի ղեկավար Դավլաթ Նազրիևը, «Մշակույթների և հանդուրժողականության երկխոսության միջոցով դեպի Համագործակցության ժողովուրդների փոխհարստացում և առաջընթաց» նշանաբանի ներքո անցկացվող համաժողովին ծրագրվում է քննարկել կրթությանն ու գիտությանը, Համագործակցության երկրների երիտասարդ սերնդին աջակցելու, մշակութային ժառանգությանը, կերպարվեստին, ճարտարապետությանն ու դիզայնին նվիրված հարցեր։
Նազրիևի խոսքերով, համաժողովին, ընդհանուր առմամբ, կմասնակցեն ԱՊՀ երկրների 350 պատվիրակներ, բացի Ուզբեկստանից և Վրաստանից։
Հանդիսավոր բացումից հետո, որը տեղի կունենա սեպտեմբերի 18-ին երկրի կառավարության քաղաքից դուրս գտնվող «Պուգուս» նստավայրում, երկօրյա համաժողովի աշխատանքը կշարունակվի գիտության և կրթության, ԱՊՀ-ի կազմի մեջ մտնող երկրների երիտասարդ սերնդին աջակցելու, մշակութային ժառանգության, գրականության և գրահատարակչության, թատրոնի և կինոյի, երաժշտության, եկեղեցական արվեստի, կերպարվեստի և զանգվածային լրատվամիջոցների ոլորտների համապատասխան պալատներում։
Համաժողովի աշխատանքի երկրորդ օրը մասնակիցների առջև ելույթ կունենա Տաջիկստանի նախագահ Էմոմալի Ռախմոնը, ինչից հետո նրան կհանձնվի «Բարեկամության ծառ» ոսկե մեդալը, որի հիմնադիրներն են ԱՊՀ Միջխորհրդարանական Ասամբլեան և «Միր» հեռուստառադիոկայանը։
Դուշանբեում կայանալիք III Համաժողովի շրջանակներում Ռուս-տաջիկական սլավոնական համալսարանում (ՌՏՍՀ) կբացվի «Ռուսկի Միր» հիմնադրամի Ռուսական երկրորդ կենտրոնը։
Ինչպես ակնկալվում է, բացման արարողությանը կմասնակցեն ՌԴ նախագահի՝ ԱՊՀ մասնակից-պետությունների հետ հումանիտար համագործակցության հարցերի հատուկ ներկայացուցիչ Ջախան Պոլիևան, Տաջիկստանում ՌԴ դեսպան Ռամազան Աբդուլատիպովը, ՄՊՀ ռեկտոր Վիկտոր Սադովնիչին, ինչպես նաև ՌՏՍՀ-ի ղեկավարությունը։-0-
