Ռուսաստանը կընդլայնի արտասահմանում ռուսաց լեզվի ուսուցմանը ցուցաբերվող աջակցությունը. Վ. Պուտին

ԵՐԵՎԱՆ, 18 հոկտեմբերի. /Նովոստի-Արմենիա/. Ռուսաստանի կառավարությունը ծրագրում է ընդլայնել արտասահմանում ռուսաց լեզվի ուսուցմանը ցուցաբերվող աջակցությունը, հայտարարել է Վ. Պուտինը, հաղորդում է «ՌԻԱ Նովոստին»։

«Կառավարության ծրագրերում նախատեսվում է այս ուղղությամբ համագործակցության ընդլայնում։ Մենք ստեղծել ենք հատուկ կազմակերպություն, որը կոչվում է «Ռուսական աշխարհ», որպեսզի աջակցենք արտասահմանում ռուսաց լեզվի ուսուցմանը, նախևառաջ նախկին Խորհրդային Միության երկրներում», - ասել է ՌԴ նախագահը՝ «ուղիղ կապի» ժամանակ պատասխանելով Ղազախստանի Ակտաու քաղաքի մի բնակչուհու՝ արտասահմանում ռուսաց լեզվի ուսուցման աջակցությանը վերաբերող հարցին։

Վ. Պուտինի խոսքերով, Ռուսաստանի ղեկավարությունը հատուկ ուշադրությամբ է վերաբերվելու այս խնդրին և հատկապես Ղազախստանում, քանի որ այդ երկրում  մեծ քանակությամբ մարդ է բնակվում, որոնք ռուսաց լեզուն համարում են իրենց մայրենի լեզուն։

 «Ղազախստանի համար դա հատկապես հրատապ է։ Միգուցե իմ տվյալները ստույգ չեն, սակայն համոզված եմ, որ սա մոտ է ճշմարտությանը. Ղազախստանում բնակչության 85 տոկոսը ռուսերեն է խոսում», - ասել է Վ. Պուտինը։

Նրա խոսքերով, Ղազախստանի ղեկավարությունը անում է ամեն ինչ, որպեսզի աջակցի ռուսաց լեզվի զարգացմանն և ազդեցությանը երկու երկրների փոխհարաբերությունների վրա։

«Իհարկե, վերջին ժամանակներս, ես կարծում եմ տեխնիկական պատճառներով կրճատվում է այն դպրոցների թիվը, որտեղ ուսուցանվում է ռուսաց լեզուն, սակայն դա երևի կապված է ռուսաց լեզվով գրականության պակասի հետ», - ասել է նա։

ՌԴ նախագահը նշել է, որ Մոսկվայում այդ խնդրից տեղյակ են, և անցած տարի ավելի քան 20 հազ. դասագիրք ուղարկվել է Ղազախստան, իսկ այս տարի նախատեսվում է ուղարկել ավելի քան 33 հազ. դասագիրք։

Վ. Պուտինը նաև նշել է, որ ռուսաց լեզվի, որպես միջազգային շփման լեզվի,  աջակցությունը, երկրի ղեկավարության գործունեության կարևոր ուղղություններից է։ --0--