Սամվել Բաբայանի դուստրը թատերական ներկայացում է անվանել հոր ձերբակալությունը

ԵՐԵՎԱՆ, 23 մարտի. /Նովոստի–Արմենիա/. Սամվել Բաբայանի դուստրը՝ Աննա Բաբայանը, Facebook-ի իր էջում հոր ձերբակալության վերաբերյալ գրառում է կատարել։

Ինչպես հայտնում է armtimes.com կայքը, Աննա Բաբայանը թատերական ներկայացում է որակել իր հոր` Սամվել Բաբայանի ձերբակալությունը։

«Հիմա խոսենք ձերբակալման զվարճալի պատմությունից: Այն ձերբակալության, որի ընթացքում հետաքրքրիր բացահայտումներ եղան: Եվ այսպես. X լրատվամիջոցը գրում է, թե այս ինչպես ԱԱԾ-ն ուշադրություն չի դարձնում Սամվել Բաբայանին, ախր նա, կարծես թե, խժդժություններ է նախապատրաստում: ԱԱԾ-ն շատ արագ արձագանքում է այս հրապարակմանը և թատերական ներկայացմամբ ձերբակալում հերոսին»,– գրել է նա։

Նա նշել է, որ քիչ անց Y օրաթերթը հրապարակել է ԱԱԾ-ի հաղորդագրությունը, թե երկու մարդ Վրաստանից Հայաստան մաքսանենգ ճանապարհով փորձել են «Իգլա» ներմուծել, ինչից հետո Z օրաթերթն էլ գրել է, թե իր տեղեկություններով ձերբակալվել է Սամվել Բաբայանը։

Աղջիկը հռետորական հարց է տվել, թե ինչպես ինչպես իմացան, երբ դեռ ԱԱԾ-ն հայտարարություն չէր տարածել, և որ նրան մեղադրում են «Իգլա» ներմուծելու մեջ:

«Այնուհետև S լրատվամիջոցն էլ գրում է, թե իրենց թղթակիցը շատ պատահաբար ներկա է եղել ձերբակալմանը: Ինչ բարեբախտություն: Ինչ երջանիկ պատահականությամբ է թղթակիցը ականատես եղել ձերբակալմանը»,– եզրափակել է Բաբայանի դուստրը։

Արցախի պաշտպանության բանակի նախկին հրամանատար, Արցախի պաշտպանության նախկին նախարար Սամվել Բաբայանը մարտի 22-ին ձերբակալվել է մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակում։ -0-