Ռուսերենը պաշտոնական կարգավիճակ չի ունենա. ՀՀ ԱԺ խոսնակը մերժել է Վոլոդինի առաջարկը

ԵՐԵՎԱՆ, 18 հուլիսի. /Նովոստի–Արմենիա/. Նախօրեին Ռուսաստանի Դաշնությունում պաշտոնական այցով գտնվող ՀՀ ԱԺ նախագահ Արա Բաբլոյանին ընդունել է ՌԴ ԴԺ Պետական դումայի նախագահ Վյաչեսլավ Վոլոդինը:

ՌԴ ԴԺ Պետական դումայի նախագահը շնորհավորել է Արա Բաբլոյանին ՀՀ ԱԺ նախագահի պաշտոնում ընտրվելու առթիվ:

Արա Բաբլոյանը, խոսելով հայ-ռուսական համագործակցության մասին, նշել է, որ վերջերս ՌԴ-ում ընդունված՝ օտար երկրների կողմից տրված վարորդական վկայականներով աշխատելն արգելող օրենքը մեծ դժվարություններ է առաջացրել Ռուսաստանում աշխատող հայերի համար: ՀՀ ԱԺ նախագահն առաջարկել է վերանայել այդ մոտեցումը, հայտնում է Հայաստանի կառավարության պաշտոնական կայքը։


ՀՀ ԱԺ նախագահը նշել է, որ Հայաստանի Հանրապետության օրակարգում ռուսերենն օրենքով որպես պաշտոնական լեզու ամրագրելու հարց չկա: ՀՀ խորհրդարանի ղեկավարը միաժամանակ նկատել է, որ ՀՀ բոլոր դպրոցներում ռուսերենը դասավանդվում է, ինչը, իր կարծիքով, ամբողջությամբ բավարարում է խնդրի լուծմանը:

Հունիսի 1-ից Ռուսաստանում ուժի մեջ է մտել երկրի տարածքում ուղևորափոխադրումների ոլորտում աշխատող անձանց կողմից օտարերկրյա վարորդական իրավունքների օգտագործման արգելքը։ Ընդ որում` հուլիսի 14-ին Պետդուման ընդունել է օրենք, որով Ղրղըզստանի, ինչպես նաև ռուսերենը որպես պաշտոնական լեզում ամրագրած այլ երկրների քաղաքացիները կարող են ՌԴ տարածքում աշխատել որպես պրոֆեսիոնալ վարորդներ` ազգային վարորդական վկայականների հիման վրա։

Օրենքի ընդունման կապակցությամբ Ռուսաստանի պետդումայի խոսնակ Վյաչեսլավ Վոլոդինը Հայաստանի իշխանություններին առաջարկել է Հայաստանի օրենսդրությունում ամրագրել ռուսերենի պաշտանական կարգավիճակը, որպեսզի ազգային վարորդական իրավունքները Ռուսաստանի տարածքում ճանաչվեն։ Այս մանին հաղորդում է ՏԱՍՍ–ը։

Կողմերը քննարկել են նաև միջազգային հարթակներում համագործակցության ամրապնդմանն առնչվող հարցեր, ձեռք են բերվել աշխատանքային նոր ձեւաչափերի ներդրման պայմանավորվածություններ: -0-