Նիդեռլանդների սենատի ղեկավար. խորապես ցնցված եմ այն տառապանքներից, որոնք կրել է հայ ժողովուրդը (ՖՈՏՈ)

ԵՐԵՎԱՆ, 16 նոյեմբերի. /Նովոստի–Արմենիա/. Պաշտոնական այցով Երևանում գտնվող Նիդեռլանդների Թագավորության Սենատի նախագահ Անկի Բրուկերս-Քնոլը այցելել է Ծիծեռնակաբերդի հուշահամալիր։

Ինչպես հայտնում է ՀՀ ԱԺ հանրային կապերի վարչությունը, նա ծաղկեպսակ է դրել Հայոց ցեղասպանության զոհերի հուշարձանին, ծաղիկներ է խոնարհել անմար կրակի մոտ և լռությամբ հարգել Սուրբ նահատակների հիշատակը։



Բարձրաստիճան հյուրը եղել է Հայոց ցեղասպանության թանգարան-ինստիտուտում, ծանոթացել Հայոց մեծ եղեռնը հավաստող վավերագրերին ու փաստաթղթերին, դիտել ցուցանմուշները, գրառում կատարել հուշամատյանում։



«Առաջին անգամ եմ լինում թանգարանում և խորապես ցնցված եմ այն տառապանքներից, որոնք կրել է հայ ժողովուրդը։ Սարսափելի և ահավոր է»,– գրել է տիկին Անկի Բրուկերս-Քնոլը։ -0-