«Միայնակ գայլին» քաղցած են պահում և փորձում են հոգեբանորեն ընկճել. պաշտպան

ԵՐԵՎԱՆ, 23 հունիսի./Նովոստի-Արմենիա/. Նախօրեին «Սասնա ծռեր» խմբի անդամ Արայիկ Խանդոյանի մոտ իբր արգելված իր են գտել։

Նրան խուզարկել են Ավան և Նոր Նորք վարչական շրջանների դատարան բերելուց առաջ իսկ դատարանից տանելուց հետո ոչ թե խուց, այլ պատժախուց են տարել: Այս մասին հաղորդում է tert.am-ը:

Կայքին տված հարցազրույցում Ա. Խանդոյանի պաշտպան Արայիկ Պապիկյանն ասել է , որ փորձ է արվում իր պաշտպանյալի նկատմամբ հոգեբանական ճնշում գործադրել: «Մեկուսացումը նաև հոգեբանական ճնշման ձև է, օրինակ, որպեսզի դատարանում չխոսի: Նա վատառողջ է, հաշմանդամ, բժշկի կարիք ունի: Եթե հաջողվի անձին ֆիզիկապես ու հոգեբանորեն ճնշել կամ ընկճել, ապա դա կազդի պայքարի կամ պաշտպանվելու վրա»,- ասել է Պապիկյանը։


Պաշտպանի խոսքով, Խանդոյանին ամբողջ օրը բացարձակապես ոչինչ մի սնունդ չեն տվել, անգամ դեղորայքը տվել են բավականին ուշ ժամի։

ԱՆ ՔԿՎ հանրային կապերի բաժնի պետ Գոռ Ղլեչյանը NEWS.am-ին տեղեկացրել է, որ «Միայնակ գայլի» մոտից գումար է հայտնաբերվել:

Արայիկ Խանդոյանին մեղադրանք է առաջադրվել ՀՀ ՔՕ 235-րդ հոդվածի 3-րդ մասով (Կազմակերպված խմբի կողմից զենք-զինամթերք ձեռք բերելը, կրելը), 218-րդ հոդվածի 3-րդ մասի 1-ին կետով (կազմակերպված խմբի կողմից պատանդ վերցնելը), 238-րդ հոդվածի 4-րդ մասի 1-ին և 2-րդ կետերով (Զենք, ռազմամթերք, պայթուցիկ նյութեր կամ պայթուցիկ սարքեր հափշտակելը կամ շորթելը): -0-