ԵՐԵՎԱՆ, 29 դեկտեմբերի./Նովոստի-Արմենիա/. Ազգային ժողովն այսօր արտահերթ նիստ է անցկացնում, որի ընթացքում քննարկվում է Նաիրա Զոհրաբյանին մարդու իրավունքների պաշտպանության և հանրային հարցերի մշտական հանձնաժողովի նախագահի լիազորությունների դադարեցման մասին ԱԺ որոշման նախագիծը:
Загружается новость ... "Лево"
Ինքը` Զոհրաբյանը, նիստին ներկա չէ, ինչպես և ողջ «Բարգավաճ Հայաստան» խմբակցությունը: Մարդու իրավունքների պաշտպանության և հանրային հարցերի մշտական հանձնաժողովի նախագահի պաշտոնը պատկանում է «Բարգավաճ Հայաստան» խմբակցությանը, որը կարող է ներկայացնել իր թեկնածուին, սակայն խմբակցությունից հայտնել են, որ իրենք չեն պատրաստվում առաջարկել նոր թեկնածու:
Ինչպես նիստի ընթացքում նշել է «Իմ քայլը» խմբակցության պատգամավոր Արթուր Հովհաննիսյանը, մարդու իրավունքների պաշտպանության և հանրային հարցերի մշտական հանձնաժողովի նախագահի ընտրությունն ու լիազորությունների դադարեցումը ԱԺ քաղաքական որոշումների ոլորտին է պատկանում:
Նրա խոսքով, ԱԺ պատգամավոր Նաիրա Զոհրաբյանի գրառումներից և հրապարակային խոսքից պարզ է դառնում, որ պատգամավորի կողմից արվում են Սահմանադրությամբ ամրագրված մարդու իրավունքների, արժանապատվության ոտնահարմանն ուղղված և վիրավորանք պարունակող հայտարարություններ: Դրանք ուղղակիորեն սահմանադրությանը հակասում են, մարդկանց միջև դասակարգում դնում՝ դրանով պայմանավորված՝ վերջիններիս՝ Սահմանադրությամբ ամրագրված ընտրելու իրավունքի իրացումը սահմանափակում:
«Նաիրա Զոհրաբյանը չի կարող լինել մի հանձնաժողովի նախագահ, որի գործունեության առանցքը մարդու իրավունքներն են: Առաջարկում ենք ԱԺ-ին կայացնել որոշում Նաիրա Զոհրաբյանի՝ հանձնաժողովի նախագահի պաշտոնում լիազորությունների դադարեցման մասին՝ դրանով ուղերձ հղելով ՀՀ քաղաքացիներին մարդու իրավունքների և արժանապատվության նկատմամբ, դրա նսեմացման անթույլատրելիության և դրա նկատմամբ ԱԺ-ի անհանդուրժողական դիրքորոշման մասին»,- նշել է Հովհաննիսյանը՝ հղում անելով Սահմանադրության դրույթներին:
Մասնավորապես, նրա խոսքով, նման որոշման հիմք է դարձել Զոհրաբյանի հրապարակային հայտարարությունները, այդ թվում հետևյալ խոսքերը՝ «Ես ատում եմ քեզ, ժեխ, որ իշխանության բերեցիր քո նմանին, ով դանդաղ փակում է մեր պետականության էջը»։
Հովհաննիսյանը հիշեցրել է, որ Սահմանադրությամբ ամրագրված է, որ իշխանությունը պատկանում է ժողովրդին և այն արտահայտվում է ազատ ընտրություններով: Նույնպես նշվում է, որ մարդը բարձրագույն արժեքն է, իսկ մարդու հիմնական իրավունքների և ազատությունների պաշտպանությունը հանդիսանում է իշխանությունների պարտավորությունը: -0-