ՀՀ նախագահը հայտնել է արտագաղթը կանգնեցնելու ձևը

ԵՐԵՎԱՆ, 10 ապրիլի. /Նովոստի –Արմենիա/. Հայաստանի նոր նախագահ Արմեն Սարգսյանը ռուսական ՏԱՍՍ գործակալության հետ հարցազրույցում պատմել է, թե ինչպես կանգնեցնել արտագաղթը ՀՀ-ից:

Ապրիլի 9-ին Երևանի Կարեն Դեմիրճյանի անվան մարզահամերգային համալիրում կայացավ Ազգային ժողովի հատուկ նիստ, որի ընթացքում կայացավ նաև ՀՀ չորրորդ նախագահ Արմեն Սարգսյանի երդմնակալության արարողությունը: Արմեն Սարգսյանը դարձավ խորհրդարանի կողմից ընտրված առաջին նախագահը խորհրդարանական իշխանավարման համակարգին անցնելուց հետո։

«Առաջնահերթ խնդիրների շարքից ես կառանձնացնեի երիտասարդության տրամադրությունը: Երիտասարդություն ասելով` ես նկատի ունեմ ոչ միայն տարիքը, հոգեվիճակը, այդ թվում` նկատի ունենալով ինքս ինձ, այլ այն, թե որքանով են երիտասարդները մոտիվացված, որքանով են տրամադրված մասնակցել երկրի առաջադիմությանը: Քանի որ կանգնեցնել արտագաղթը և, առաջին հերթին երիտասարդների արտագաղթը, կարելի է միայն ստեղծելով համապատասխան պայմաններ ինքնաարտահայտման, երիտասարդների ինքնահաստատման, պետության կառուցմանը, հասարակության կյանքում, գիտության կյանքում, կրթության ոլորտում, բիզնեսում, սպորտում նրանց լիարժեք մասնակցության համար` ամենուրեք, որտեղ նրանք կարող են ու ցանկանում են մասնակցություն ունենալ», - ասել է Սարգսյանը:


Ըստ նրա, ուրախալի է, որ Հայաստանում կան նորարարությանը, տեղեկատվական տեխնոլոգիաների, կրթական նոր ձևերում երիտասարդներին ակտիվ ներգրավման մի քանի հաջողված օրինակներ: Դա «Թումո» ստեղծարար տեխնոլոգիաների կենտրոնն է, «Սինոփսիս Արմենիա» ՏՏ ոլորտի ընկերությունը, նոր ժամանակակից դպրոցներն ու համալսարանները:

«Համոզված եմ, որ անհրաժեշտ է հետևողականորեն զարգացնել այդ միտումը: Ի դեպ, Հայաստանում մենք փորձում ենք գրավիչ դարձնել նույնիսկ ծառայությունը բանակում: Հանրապետության պաշտպանության նախարարությունն աշխատում է ստեղծագործական ծրագրերի իրականացման վրա, որոնք խթանում են ծառայությունը բանակում համալսարանական կրթություն ստանալու ու ամուր սոցիալական երաշխիքների հետ զուգորդված», - ասել է Սարգսյանը:-0-