ԵՐԵՎԱՆ, 29 հունվարի./Նովոստի–Արմենիա/. Հայաստանում հոսպիտալացվել է Չինաստանի երկու քաղաքացի` կորոնավիրուս ունենալու հավանականությամբ։ Այս մասին հայտնեց ՀՀ Հիվանդությունների վերահսկման և կանխարգելման ազգային կենտրոնի Հատուկ վտանգավոր և օդակաթիլային վարակների բաժնի պետ Լիանա Թորոսյանը։
Չորեքշաբթի մամուլի ասուլիսի ժամանակ նա հայտնեց, որ օրերս Հայաստան–Վրաստան սահմանի վրա կանգնեցրել են մի խումբ զբոսաշրջիկների, այդ թվում Չինաստանի երկու քաղաքացիների։
Նրա խոսքով, նրանց թույլ չեն տվել Վրաստանի տարածք մտնել, քանի որ նրանցից մեկի մոտ բարձր ջերմություն է եղել։
«Երկու չինացիները հետազոտություն են անցել, նրանցից մեկի մոտ ոչ մի ախտանիշ չի հայտնաբերվել, երկրորդի մոտ գրանցվել է ոչ բարձր ջերմություն` 37 աստիճանից ոչ ավելի, անցկացվում է ախտորոշում. կա թոքերի բորբոքման հավանականություն։ Նա գտնվում է բժիշկների վերահսկողության տակ»,– նշել է Թորոսյանը։
Նա նույնպես ընդգծեց, որ մինչև լիարժեք անալիզների անցկացումը Չինաստանի երկու քաղաքացիները կմնան վերակենդանացման բաժանմունքում, բժիշկների վերահսկղության ներքո` հավելելով, որ ամենայն հավանականությամբ հիվանդի մոտ սովորական ռինովիրուս է։
«Հարկ է նշել, որ նրանք Հայաստան են ժամանել տարածաշրջանային տուրի շրջանակում` մի քանի օր անցկացնելով Վրաստանում, ինչից հետո` Հայաստանում, նրանց մոտ ինկուբացիոն ժամանակահատվածն արդեն անցել է։ Չի բացառվում, որ նա վարակվել է սեզոնային վիրուսով`հաշվի առնելով Հայաստանում շնչառական հիվանդությունների տարածվածությունը»,– ասել է Թորոսյանը` հավելելով, որ նրանք Հայաստան են եկել չինական ուրիշ նահանգից։
Նա նույնպես ընդգծեց, որ Հայաստանը կորոնավիրուսով վարակման քիչ հավանականությամբ երկրներից է, իսկ ԱՀԿ–ի գնահատականներով, կանխարգելիչ բոլոր միջոցառումները ձեռնարկվել են գրագետ և օպերատիվ ձևով։
Նրա խոսքով, հարևան Վրաստանում տվյալ պահին նույնպես նոր կորոնավիրուսով վարակման ոչ մի դեպք չի գրանցվել։
Դեկտեմբերին Չինաստանի Ուհան քաղաքում գրանցվել է թոքաբորբի բռնկում։ Ավելի ուշ հայտնի դարձավ, որ հիվանդության պատճառը կորոնավիրուսի անհայտ տեսակն է։
Հիվանդության առանձին դեպքեր են գրանցվել Չինաստանի սահմաններից դուրս` Հարավային Կորեայում, Ճապոնիայում, Թաիլանդում, Ավստրալիայում, Մալայզիայում, ԱՄՆ–ում, Վիետնամում և Սինգապուրում։-0-
