Հայաստանից մարդասիրական օգնություն է տեղափոխվել Լաթաքիայի հայկական եկեղեցի (ԼՈՒՍԱՆԿԱՐՆԵՐ, ՏԵՍԱՆՅՈՒԹ)

ԵՐԵՎԱՆ, 15 փետրվարի. /Նովոստի-Արմենիա/. Հայաստանից Սիրիայի զինված հակամարտության հետևանքով տուժած բնակիչների համար մարդասիրական օգնության առաջին խմբաքանակը չորեքշաբթի տեղափոխվել է Լաթաքիայի Սուրբ Աստվածածնի հայկական եկեղեցի, տեղեկանում ենք հայկական արտաքին գերատեսչության Facebook–ի էջից։





Նախօրեին Լաթաքիայում բեռը դիմավորել է Հալեպում Հայաստանի գլխավոր հյուպատոս Տիգրան Գևորգյանը։



18 տոննա պարենը տեղափոխվել է նախօրեին Սիրիա ռուսական ԻԼ-76 ռազմատրանսպորտային ինքնաթիռով։





Սա Հայաստանից Սիրիա ուղարկած մարդասիրական օգնության արդեն երրորդ օդանավն է։ Նախորդ տարի ռուսական երկու ինքնաթիռներ այդ երկիր են տեղափոխել 40 տոննա պարենամթերք։ Առաջիկայում նախատեսվում է ուղարկել ևս 17 տոննա մարդասիրական օգնություն` հագուստ, վերմակներ և քնապարկեր։



Սիրիահայ համայնքը մինչև այդ երկրում հակամարտության սկսվելը մոտ 110 հազար մարդ էր ներառում։ Սիրիահայերը հիմնականում ապրում էին Հալեպում, Դամասկոսում, Լաթաքիայում, Քեսաբում և Էլ Քամըշլիում։ Պատերազմից հետո ավելի քան 90 հազար հայ լքեց երկիրը։ -0-