Հայաստանի դպրոցները պետք է պատրաստվեն սեպտեմբերի 1–ին

ԵՐԵՎԱՆ, 27 հուլիսի. /Նովոստի–Արմենիա/. Հայաստանի դպրոցների շինարարական և նորոգման աշխատանքները պետք է ավարտվեն մինչև 2017-2018 նոր ուստարվա սկիզբը։

Համապատասխան հանձնարարականը վարչապետ Կարեն Կարապետյանը կրթության և գիտության նախարարին, ինչպես նաև մարզպետներին տվել է հինգշաբթի կառավարության հերթական նիստում։ Նույն առաջարկը վարչապետն ուղղել է նաև Երևանի քաղաքապետին։


Աշխատանքի չկատարման կամ կիսատ կատարելու դեպքում հասցեական կոշտ պատժամիջոցներ կկիրառվեն։

Կարապետյանը հանձնարարեց նաև մինչև սեպտեմբեր քայլեր ձեռնարկել և Հայաստանի սահմանամերձ ու լեռնային շրջանների դպրոցներն ապահովել մասնագիտական առարկաների ուսուցիչներով։

Հայաստանի կրթության և գիտության նախարար Լևոն Մկրտչյանն իր հերթին հայտնեց, որ այս պահին աշխատանքներ են տարվում սահմանամերձ մարզերի դպրոցականների դասագրքերի արժեքի փոխհատուցման, ինչպես նաև երկրի սահմանամերձ շրջանների ուսանողների ուսման վճարման հատուկ մեխանիզմների ներդրման ուղղությամբ։ -0-