«Եթե Քյարամյանի ասածն ապացուցվի, ապա ես իմ մանդատից կհրաժարվեմ». Հովիկ Աղազարյան
ԵՐԵՎԱՆ, 30 հոկտեմբերի․/Նովոստի–Արմենիա/․ Քրեական վրույթ է հարուցված այդ փաստի հետ կապված եւ տրամաբանական կլինի, որ նաեւ դրանից հետո իշխանությունն արձագանք տա:
Այս մասին news.am-ի հետ զրույցում նշեl 1 ԱԺ «Քաղաքացիական պայմանագիր» խմբակցության պատգամավոր Հովիկ Աղազարյանը՝ անդրադառնալով նրան, որ իր եւ ՔԿ նախագահ Արգիշտի Քյարամյանի հետ կապված միջադեպից հետո այսօր Քյարամյանն ափսոսանք է հայտնել տեղի ունեցածի համար եւ կարծես դրանով թեման փակվում է:
«Ես կարծում եմ, որ պարոն Քյարամյանի խառնվածքի տեր մարդը չի կարող զբաղեցնել այդպիսի պատասխանատու եւ կարեւոր պաշտոն, բայց ես որոշում կայացնողը չեմ: Որոշում կայացնողը ՀՀ վարչապետն է, ով լավ տեղյակ է՝ ինչ տեղի ունեցել, ինքը էլի բաներ գիտի, որ մենք չգիտենք, ես չգիտեմ: Հետեւաբար, նա ամեն ինչ կշռադատում է, նոր կայացնում է որոշում: Ես հարիր չեմ համարում, որ որեւէ պատգամավոր կամ պատգամավորների խումբ ճնշում գործադրի վարչապետի վրա այդ առումով», – ասել է նա։
Խոսելով ափսոսանք հայտնելու մասին, Աղազարյանն ասել է. «Շատ ապրի, որ տղամարդուն վայել քայլ է կատարում, բայց որոշում կայացնողը պետք է որոշում կայացնի: Իմ մտահոգությունն այլ է, որը ես արտահայտեցի այդ լսումների ժամանակ իմ ելույթում: Ես համարում եմ, որ կալանքը չպետք է օգտագործվի որպես ճնշման միջոց՝ ցանկալի ցուցմունքներ կորզելու համար: Այդպիսի դեպքեր կան: Եթե ես սխալվում եմ եւ այդպիսի բան չկա, կամ եթե պարոն Քյարամյանը հետագայում իր ենթակաների հետ զրույցներ կունենա, որ այդպիսի բաներ տեղի չունենա, ապա ես ինքս որպես պատգամավոր կհամարեմ, որ ինչ-որ իմաստով օգտակար եմ եղել մեր պետությանն ու հասարակությանը»:
Ինչ վերաբերում է նրան, որ Քյարամյանն այդպես էլ անուններ չտվեց, թե ով է Հովիկ Աղազարյանի անունից՝ իրեն դիմել, ՔՊ-ական պատգամավորն ասել է. «Ես հիմա էլ եմ հայտարարում, անկախ նրանից, թե ինչ կորոշի վարչապետը, ինչ կորոշի վարչությունը իմ հետ կապված, եթե դա ապացուցվի, ապա ես իմ մանդատից կհրաժարվեմ»:
Հիշեցնենք, որ Ազգային ժողովում խորհրդարանական լսումների ժամանակ ՔՊ-ական պատգամավոր Հովիկ Աղազարյանի և ՔԿ նախագահ Արգիշտի Քյարամյանի միջև թեժ բանավեճ էր տեղի ունեցել։
Կարդացեք նաև՝ ««Ի՞նչ խաչ է ձեր ձեռքին, «հանցավոր աշխարհի՞ց» է ուղարկվել»․ հարց Քյարամյանին»
