ԵՐԵՎԱՆ, 11 նոյեմբերի./Նովոստի–Արմենիա/. Երևանի բոլոր կոմունալ ծառայությունները Ամանորի տոնական օրերին կիրականացնեն շուրջօրյա օպերատիվ հերթապահություն:
Դրա վերաբերյալ հանձնարարական է տվել քաղաքապետ Տարոն Մարգարյանը Երևանի քաղաքապետարանում կայացած աշխատանքային խորհրդակցության ժամանակ։
Տոնական ոչ աշխատանքային օրերին բնակչության կողմից «Թեժ գիծ» ծառայության հեռախոսահամարներով ստացվող զանգերին հնարավորին արագ արձագանքելու նպատակով աշխատակազմի քարտուղարին հանձնարարվել է կազմել հստակ ժամանակացույց` Երևանի քաղաքապետարանի Արգիշտի 1 և Բյուզանդի 1/3 վարչական շենքերում իրականացնելու շուրջօրյա հերթապահություն:
Նույն հանձնարարականը տրվել է նաև 12 վարչական շրջանների ղեկավարներին, ինչպես նաև կենսապահովման ոլորտի ծառայություններ մատուցող ընկերություններին:
Հանձնարարել է սահմանել շուրջօրյա հերթապահություն` համագործակցելով «Վեոլիա Ջուր», «Գազպրոմ Արմենիա» և «Հայաստանի էլեկտրական ցանցեր» ընկերությունների ներկայացուցիչների հետ, տոնական օրերին վթարների մասին ահազանգերի դեպքում արագորեն արձագանքել և կարգավորել առաջացած խնդիրները:
Загружается новость ...
"Право"
Առողջապահական և «Շտապբուժօգնության» ծառայությունների պատասխանատուներին ևս քաղաքապետը հանձնարարել է օպերատիվ հերթապահություն իրականացնել և ուժեղացնել հսկողությունը քաղաքապետարանի ենթակայության բոլոր բուժհաստատություններում:
Հանձնարարվել է հերթապահություն սահմանել նաև կրթամշակութային և մարզական հաստատություններում՝ ջրամատակարարման, էլեկտրամատակարարման և ջեռուցման համակարգերի անխափան աշխատանքն ապահովելու նպատակով:
Հաշվի առնելով տոնական օրերին քաղաքացիների ակտիվ տեղաշարժը` քաղաքապետի կողմից հանձնարարական է տրվել խստորեն վերահսկել հասարակական տրանսպորտի աշխատանքի պատշաճ կազմակերպումն ու ապահովումը:
«Հատկապես տոնական օրերին նկատվող կենցաղային աղբի ծավալների զգալի ավելացումը հաշվի առնելով էլ աշխատակազմի կոմունալ տնտեսության վարչությանը և հատուկ օպերատիվ շտաբին հանձնարարվել է վերահսկել այդ ժամանակահատվածում «Սանիթեք» ընկերության կողմից աղբահանության պատշաճ կազմակերպումն ու սանիտարական մաքրման իրականացումը մայրաքաղաքում»,– ասվում է հաղորդման մեջ։
Միաժամանակ, հանձնարարվել է տոնական օրերին ապահովել նաև մայրաքաղաքի անխափան արտաքին լուսավորությունը: -0-
