Երեխաներիս վիճակի մասին կայքերից եմ իմանում. հնգյակի հայր

ԵՐԵՎԱՆ, 8 մայիսի. /Նովոստի-Արմենիա/. «Էրեբունի» բժշկական կենտրոնում ծնված հնգյակի ծնողները վրդովված են:

Հնգյակի հայրը՝ Վարդան Կարապետյանը, ասել է, թե հիվանդանոցը նախապես պատրաստված չի եղել ընդունելու երեխաների ծնունդը՝ հաշվի առնելով դեպքի բացառիկությունը, հայտնում է tert.am-ը:

Նա նշել է, որ երեխաներին լուրջ մասնագետներ են անհրաժեշտ և վրդովմունք է հայտնել, որ արտասահմանից մասնագետներ չեն հրավիրվել և լուրջ հսկողություն նորածինների նկատմամբ չի սահմանվել:

«Հիմա լսել ենք, որ նոր-նոր ուզում են դրսից մասնագետներ հրավիրեն. ի՞նչ է դա նշանակում, որ տեսնեն՝ երեխաների վիճակը վատանում է, նո՞ր կանչեն։ Ինչո՞ւ հենց սկզբից չեն դա արել, որ այսօրվա օրով իմ երկու երեխաները հիմա չկան»,- ասել է հայրը tert.am-ին:

Վարդան Կարապետյանը նշել է, թե չի ասում, որ բժիշկներն անտարբեր են երեխաների նկատմամբ: Պարզապես, նրա խոսքով, ավելին անել հայ մասնագետները չեն կարողանում: «Ինչպե՞ս է, որ Գերմանիայում ծնվել է 400 գրամանոց երեխա, հիմա 18 տարեկան է, իսկ ես իմ երեխային 900 գրամ տվել եմ բժիշկներին, հիմա ինձ մեռած հետ են տվել, ո՞նց հասկանամ դա: Պատճառ են բերում՝ գլխուղեղի արյան զեղում, ի՞նչ զեղում, երբ նորմալ սնվում էր, իրենց ասելով՝ դեպի լավն էր գնում, միանգամից արյան զեղում»։

Հնգյակի հայրը շարունակեց, թե իրեն չեն էլ տեղեկացնում, թե երեխաների վիճակն ինչպես է: «Իմ երկու երեխաների մահվան լուրը ես կայքերից եմ իմացել: Խոսքը իմ բժշկի մասին չէ՝ Դավիթ Լևոնիչի՝ Դավիթ Աբովյանի, ինքը միակ մարդ-բժիշկն է։ Երբ զանգել եմ, գիշերվա որ ժամին էլ լինի, ինքը իմ կողքը կանգնած է եղել, ինքը անձամբ ձեռքի համարը տվել է: Բայց հիմա բժիշկներից որ ուզում եմ լուր իմանամ, ասում եմ՝ ձեր հեռախոսի համարը տվեք, ինձ տալիս են քաղաքային հեռախոսահամար»,– ասել է նա, նշելով, որ այդ հեռախոսահամարներով դժվար է լինում տեղեկատվություն ստանալ։

Հայրը տեղյակ չէ, թե որքանով է ճիշտ տեղեկությունը, որ արդեն դրսից մասնագետ են հրավիրել: Նրա խոսքով, լսել է, թե Ռուսաստանից մասնագետ են հրավիրում, ու ասում են, թե իր երեք երեխան էլ ծանր են, տղան, ասում են, ծայրահեղ ծանր է։

«Բայց տենց ո՞նց կլինի՝ նորմալ քաշով էլ տվել ենք, ամենամեծ քաշն է եղել, հիմա ասում են, որ միացված է Հայաստանի ամենալավ միակ ապարատին ու տղաս, ասում են, այդ միակ ապարատով է շնչում: Բա որ գիտեիք մի ամիս առաջ, որ նման երեխաներ են ծնվելու, ու Հայաստանում նման բան չի եղել, գիտեիք, որ երեխեքը թերաճ են ծնվելու, լրիվ զարգացած չեն ծնվելու, ինչո՞ւ այդ մասնագետին շուտ չէիք կանչել, շուտ չէիք նախապատրաստվել, ասել, որ նման բան է լինելու։ Կհետաձգեր, կարող է հնարավոր լիներ, որ այդքան շուտ էլ չծնվեր. երկու շաբաթ իրենց մամայի արգանդում կարողանային ավել պահել, ավելի լավ կզարգանային»,- ասել է փոքրիկների հայրը, ավելացնելով, որ նույնիսկ իր թշնամուն չէր ցանկանա այդպիսի ցավ զգալ:

«Էրեբունի» ԲԿ–ում մայիսի 3–ի գիշերը կեսարյան հատմամբ լույս աշխարհ էր եկել հնգյակ` 4 աղջիկ և 1 տղա։ Կարապետյանների ընտանիքում ծնված փոքրիկները լույս աշխարհ էին եկել 600, 820, 840, 840 և 880 գրամ քաշով։

Նրանց ծնվելուց անմիջապես հետո ձեռնարկվել են անհրաժեշտ ռեանիմոցիոն գործողություններ։ Նրանք տեղափոխվել են տարբեր մայրաքաղաքի կլինիկաներ։-0-