«Եկեք այնպես անենք, որպեսզի թռչող կոշիկների երեկոն տեղի չունենա». Ռուբինյանը՝ պատգամավորներին (ՎԻԴԵՈ)

ԵՐԵՎԱՆ, 16 սեպտեմբերի․ /Նովոստի–Արմենիա/․ ԱԺ-ում ՀՀ վարչապետ Նիկոլ Փաշինյանի ելույթի ընթացքում ընդդիմադիր «Հայաստան» դաշինքի պատգամավոր Լևոն Քոչարյանի պահվածքին արձագանքելով՝ ՔՊ-ական պատգամավոր Էդուարդ Աղաջանյանը հայտարարել է, որ նման վարքագծի կրկնության դեպքում նրա ուղղությամբ «64 կոշիկ կսլանա»։

Աղաջանյանի խոսքով՝ վարչապետի ելույթի ժամանակ Քոչարյանը ձեռքերով հասկացնում էր, թե պատրաստվում է կոշիկ նետել դեպի ամբիոն։

«Խնդրում եմ փոխանցեք Ռոբերտ Քոչարյանի որդուն, որ ինքը, եթե իրեն չհավաքի, և նման բան ևս մեկ անգամ կրկնվի, դահլիճի էս մասից տարբեր չափերի և բրենդերի 64 կոշիկ միաժամանակ կսլանան իր ուղղությամբ»,- ասաց Աղաջանյանը։

Ի պատասխան՝ ԱԺ նախագահ Ռուբեն Ռուբինյանը հորդորեց բռնության չդիմել։

«Ամեն դեպքում եկեք այնպես անենք, որպեսզի «թռչող կոշիկների երեկոն» տեղի չունենա Ազգային ժողովում։ Պարոն Քոչարյան կրտսերը, ըստ իմ գնահատականի, բավականին կոմպլեքսավորված անձնավորություն է և, թերևս, իր էմոցիաներն արտահայտելիս չի կարողանում մեկ-մեկ զսպել իրեն։ Ես կարծում եմ՝ մենք այլ մեթոդների պետք է դիմենք նրան կոմպլեքսներից ազատելու մեր գործում։ Նախ, կոշիկներն ափսոս են։ Երկրորդ՝ չեմ կարծում, որ բռնությունը ողջունելի է այս դահլիճում»,- նշեց Ռուբինյանը։