«ԱրմենՏելը» խնդրում է չլիցքավորել անհայտ բաժանորդների հաշիվներ` կարեկցանքից ելնելով

ԵՐԵՎԱՆ, 11 ապրիլի. /Նովոստի–Արմենիա/. «ԱրմենՏել» ՓԲԸ-ն («Beeline» ապրանքանիշ) կոչ է անում բաժանորդներին զգուշանալ հնարավոր մեքենայություններից։

Ինչպես հայտնում է ընկերության մամուլի ծառայությունը, «ԱրմենՏել» ընկերությունը կոչ է անում չլիցքավորել անհայտ ինքնությամբ բաժանորդների հաշվեկշիռը «Լիցքավորի՛ր իմ հաշիվը» ծառայության միջոցով կամ վերալիցքավորում կատարել՝ կարեկցանքից դրդված:

«Հավանական է` նման աջակցության խնդրանքով դիմող անձիք զբաղվում են խարդախությամբ»,– ասվում է հաղորդագրությունում։

Ընկերությունը նաև կոչ է անում բաժանորդներին հեռախոսային խոսակցության միջոցով տեղեկություններ չհաղորդել ԼՂՀ տարածքում գտնվող անձանց և նրանց գտնվելու վայրի վերաբերյալ:

«Անվտանգության նկատառումներից ելնելով` անհրաժեշտ է զգուշանալ հեռախոսային խոսակցության միջոցով նմանատիպ կամ ցանկացած այլ տեղեկատվություն տրամադրելուց, որը կարող է պարունակել ռազմական և երկրի անվտանգության հետ կապված գաղտնի տեղեկություններ»,– նշում են ընկերությունից։

«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։ –0–