ԵՐԵՎԱՆ, 6 փետրվարի. /Նովոստի–Արմենիա/. Ֆրանսիայի նախագահ Էմանուել Մակրոնը որոշել է ապրիլի 24–ը հռչակել Հայոց ցեղասպանության զոհերի հիշատակի ազգային օր։ Այս մասին երեքշաբթի հայտարարել է Մակրոնը` ելույթ ունենալով Ֆրանսիայում կազմակերպված Հայկական կազմակերպությունների համակարգող խորհրդի ամենամյա ընթրիքի ժամանակ, հաղորդում է ՏԱՍՍ–ը։
Ֆրանսիայի նախագահի խոսքով, Ֆրանսիան «1915թ.–ից ցեղասպանությունն անվանում է հենց ցեղասպանություն, հանցագործություն մարդկության, քաղաքակրթության դեմ, որը երկար պայքարից հետո 2001թ.–ին օրենքով ճանաչվեց ցեղասպանություն»։
«Ֆրանսահայերի պատմությունը Ֆրանսիայի պատմությունն է։ Եվ քանի որ Հայոց ցեղասպանությունը մեր հիշողության մի մասն է, այդ հիշողությունը պետք է հարգվի մեր հանրապետությունում։ Ես ձեզ հետ միասին ողջ ուժով պայքարելու եմ ժխտման ցանկացած ձևերի դեմ, որը վիրավորում է զոհերի հիշատակն ու ողջ մնացածների արժանապատվությունը», – ավելացրել է նա։
«Հիմա Թուրքիայի նախագահը չի կիսում...Ֆրանսիայի տեսլականն ու մեր արժեքներն այս համատեքստում», – հայտարարել է Մակրոնը։ Նա ընդգծել է, որ «նախագահ Էրդողանն ամբողջ թուրք ժողովուրդը չէ» և խոստացել է շարունակել երկխոսությունը պատմական փաստերը տեղ հասցնելու նպատակով։
«Եվ այսօր, երբ մենք կազմակերպում ենք խաղաղության համաժողով, ես ձեզ հստակ ասում եմ...Ֆրանսիայի նախագահի ամբողջ պատասխանատվությունը Թուրքիայի նախագահին երկխոսության հրավիրելն է», – նշել է Մակրոնը։
Ֆրանսիան Հայոց ցեղասպանությունը պաշտոնապես ճանաչել է 2001թ.–ի հունվարի 29–ին։
Հայոց ցեղասպանության փաստը ճանաչել են բազմաթիվ երկրներ, մասնավորապես` Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Չեխիայի խորհրդարանը, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի, Լյուքսեմբուրգի խորհրդարանները, Կանադայի խորհրդարանի համայնքների պալատը և Լեհաստանի սեյմը, Պարագվայի Սենատը,Վատիկանը, Եվրախորհդարանը, Եկեղեցիների համաշխարհային խորհուրդը, Գերմանիայի Բունդեսթագը և այլ երկրների խորհրդարաններ: -0-