ԵՐԵՎԱՆ, 9 փետրվարի․/Նովոստի–Արմենիա/․ԱԺ–ում նախօրեին ելույթի ժամանակ «Քաղաքացիական պայմանագիր» խմբակցության պատգամավոր Խաչատուր Սուքիասյանն անդրադարձավ իշխանության պատասխանատվության հարցին աշխարհի գլոբալ տրանսֆորմացիայի պայմաններում, ինչպես նաև քաղաքական կուսակցությունների կազմակերպվածությանը ժողովրդի պաշտպանության համար։
«Միգուցե 100 տարի առաջ ինտերնետ ունենայինք, հնարավոր լիներ այդ ձևով ցեղասպանություն չունենայինք, որովհետև այդ ժամանակ կազմակերպված չեն եղել կուսակցությունները, որովհետև դրանից խայտառակ պատմություն աշխարհի շատ քիչ ազգեր ունեն, որ կարող են ցեղասպանվել, քաղաքական մի քանի կուսակցություն լինեն և չկարողանան կազմակերպել, դիմադրել ու պայքարել»,– ասաց նա։
Նրա խոսքով, այն, ինչ ունեցել ենք պատմության ընթացքում, իհարկե, դրա համար կարող ենք մեղադրել բոլոր ժամանակների իշխանություններին։
«Բայց միևնույն ժամանակ պետք է հասկանանք՝ դա որ պահից է սկսել․ 100 տարի առաջ, 200 տարի առաջ, կամ ինչու ենք ձախողվել», - նշել է Սուքիասյանը։
Նրան ավելի ուշ արձագանքել է «Հայաստան» ընդդիմադիր խմբակցության քարտուղար, ՀՅԴ անդամ Արծվիկ Միասնայնը։
«Հիմա էլ ինտերնետ կա, ո՞նց Արցախի ժողովուրդը ցեղասպանվեց, ո՞նց տեղահանվեց», – ասաց Մինասյանը։
Նա նշեց, որ եկել է ժամանակը գիտակցելու, որ դրանում մեղավոր է նաև գործող իշխանությունն՝ իր անգործությամբ և հանցավոր մեղսակցությամբ։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
