Հայաստանը պատրաստ է Ադրբեջանի հետ խաղաղ բանակցությունները վերսկսելուն.Փաշինյան (ՎԻԴԵՈ)

ԵՐԵՎԱՆ, 12 օգոստոսի./Նովոստի–Արմենիա/. Ադրբեջանի հետ խաղաղ բանակցություններ վերսկսելու առումով Հայաստանը պատրաստ է ԵԱՀԿ ՄԽ հովանու ներքո բանակցային գործընթացում ներգրավվել թե բարձր, թե բարձրագույն մակարդակում և  սպասում է կոնկրետ առաջարկների։ Այս մասին հայտարարեց ՀՀ վարչապետ Նիկոլ Փաշինյանը կառավարության այսօրվա նիստում։

«Հայաստանի, Արցախի և տարածաշրջանի համար խաղաղ զարգացման դարաշրջան բացելու մեր ժողովրդից ստացած մանդատը կառավարության վրա դնում է հատուկ պատասխանատվություն։ Այս խնդիրը լուծելու համար մենք պետք է լինենք առավելագույնս ակտիվ և ճկուն։ Մեր տրամադրությունը և տրամադրվածությունը պիտի լինի հետևյալը` առավելագույնն անել օրակարգում առկա խնդիրներով լուծումների գնալու համար», – ասաց վարչապետը։

Նրա խոսքով, կան հարցեր, որոնք հնարավոր է լուծել ավելի արագ, հարցեր կան, որոնց լուծումը ավելի երկար ժամանակ է պահանջում։

«Բայց մեր տրամադրվածությունը պիտի լինի հետևյալը` գնալ լուծումների։ Նման հարցերից մեկը, որը, կարծում եմ, հնարավոր է բավական արագ լուծել տարածաշրջանային կոմունիկացիաների բացումն է, տարածաշրջանային ապաշրջափակման օրակարգը, և կարծում եմ` պետք է օր առաջ սկսել աշխատանքը փոխվարչապետերի եռակողմ ձևաչափում, լինենք առավել ակտիվ և նախաձեռնող տարածաշրջանում նոր կոմունիկացիոն և տնտեսական հնարավորությունների իրագործման տեսանկյունից», – ասաց վարչապետը։

Նա ընդգծեց, որ Հայաստանի համար միանշանակ ընդունելի է սադրիչ գործողություններից և հայտարարություններից զերծ մնալու ԵԱՀԿ ՄԽ համանախագահների կոչը, և ակնհայտ է, որ այս պայմանի պահպանումը առանցքային նշանակություն ունի պատեհ բանակցային մթնոլորտ և միջավայր ձևավորելու համար։–0–