«Հալալ է, Պետրոսյան Գևորգի ցավը տանեմ». Ծառուկյանը մեկնաբանել է Գևորգ Պետրոսյանի ելույթն ԱԺ–ում (ՎԻԴԵՈ)

ԵՐԵՎԱՆ, 13 նոյեմբերի./Նովոստի–Արմենիա/. Գևորգ Պետրոսյանը շատ հարգալից ներկայացրել է «Բարգավաճ Հայաստան» կուսակցության մոտեցումը։ Այսօր ԱԺ–ում հայտարարել է «Բարգավաճ Հայաստան» կուսակցության առաջնորդ Գագիկ Ծառուկյանը` մեկնաբանելով երեկ ԱԺ–ում Գևորգ Պետրոսյանի առաջարկը, ըստ որի Հայաստանում օրենքով արգելվելու է նույնասեռականների և սեռափոխվածների միասեռ ամուսնությունները և նրանց երեխա որդեգրելու իրավունքը:

Հիշեցնենք, որ նախօրեին իր ելույթի ժամանակ Պետրոսյանը նշել է, որ մենք նահապետական ժողովուրդ ենք, ավանդապաշտ ազգ ենք և անհրաժեշտ է պաշտպանել ազգային ավանդույթները։

«Ով դեմ է քվեարկելու, կցանկանա՞ր իր ընտանիքում նման երևույթ տեսներ», - հարց է ուղղել պատգամավորն` ինչին ի պատասխան բուռն արձագանքել է ԱԺ խոսնակ Արարատ Միրզոյանը։

«Պարոն Պետրոսյան, ի՞նչ եք խոսում։ Դուք կուզենա՞ք ձեր ընտանիքում... Էդ ի՞նչ անձնավորված բաներ ա, մի հատ էլ քֆուր դնեիք քվեարկելու համար», - նշել է Միրզոյանը։

«Կարող եք 7 անգամ միացնել նայել, որևիցե վիրավորական բան չկա», - ասաց Ծառուկյանը` նշելով, որ Պետրոսյանը ելույթից առաջ էլ ասել է, որ որևիցե մեկին վիրավորելու ցանկություն չունի։

«Այո, հալալ է, Պետրոսյան Գևորգի ցավը տանեմ: Առաջին քրիստոնյա ազգն ենք, մեր համար անընդունելի է, որ կարող են համսեռամոլները երեխա որդեգրեն ու այդ երեխային դաստիարակեն, ո՞վ կարող է պատկերացնել, թե նրանց դաստիրակած երեխան ինչ կարող է լինել: Մենք ավանդական ազգ ենք: ԲՀԿ-ի համար, սկսած Գագիկ Ծառուկյանից, դա անընդունելի է: Թող ասեն՝ մենք հետամնաց ենք։ Մեր համար դա անընդունելի է», – ասաց Ծառուկյանը։–0–