Հակոբ Արշակյանը հրաժարակա՞ն է տվել բարձր տեխնոլոգիաների արդյունաբերության նախարարի պաշտոնից. պարզում ենք իրավիճակը

ԵՐԵՎԱՆ, 31 մարտի./Նովոստի–Արմենիա/. Հայկական ԶԼՄ–ներում այսօր տեղեկություններ տարածվեցին այն մասին, որ ՀՀ բարձր տեխնոլոգիաների արդյունաբերության նախարար Հակոբ Արշակյանը հրաժարական է տվել։

«Նովոստի–Արմենիա» գործակալությունը կապվել է նախարարի մամուլի քարտուղար Լուսինե Մովսիսյանի հետ, ով սկզբում չէր պատասխանում հեռախոսազանգերին` տեղեկացնելով, որ նախարարի հետ միասին հանդիպման է։ Ավելի ուշ Մովսիսյանը հայտարարեց, որ չի հաստատում և չի հերքում այն խոսակցությունները, որ նախարարը հրաժարականի դիմում է ներկայացրել։ 

«Նովոստի–Արմենիա» գործակալության թղթակիցը կապ հաստատեց ՀՀ վարչապետի մամուլի քարտուղար Մանե Գևորգյանի հետ, ով նշեց, որ այս պահին վարչապետի աշխատակազմը նման դիմում չի ստացել։

Գործակալության խնդրանքով մեկնաբանելով լուրերն այն մասին, որ սա Արշակյանի կողմից ներկայացվող հրաժարականի առաջին դիմումը չէ` Գևորգյանը նշեց, որ «առնվազն վերջին տարվա ընթացքում մենք Հակոբ Արշակյանից նմանատիպ ոչ մի դիմում չենք ստացել»։

Ինչպես նշում են հայկական ԶԼՄ–ները, Արշակյանը վերջին ժամանակվա ընթացքում ներկայացրել է հրաժարականի արդեն երկրորդ դիմումը, և եթե առաջին անգամ վարչապետ Նիկոլ Փաշինյանին և տարածքային կառավարման ու զարգացման նախարար Սուրեն Պապիկյանին իբր հաջողվել է համոզել Արշակյանին չհեռանալ պաշտոնից, ապա երկրորդ անգամ վարչապետը հրաժարականի դիմումը ստորագրել է։

Արշակյանի հրաժարականի հնարավոր պատճառների թվում նշվում է Աբու Դաբիում կայացած ռազմարդյունաբերական ցուցահանդեսին Հայաստանի ձախողված մասնակցությունը, երբ հայկական տաղավարում ներկայացված էին միայն բուկլետներ, ոչ մի ցուցանմուշ չէր հասել Աբու Դաբի, ինչի համար նախարարության մի քանի աշխատակից նկատողություն է ստացել։

Որպես երկրորդ հնարավոր պատճառ նշվում է նախարարի կոնֆլիկտը լրագրողի հետ, երբ Արշակյանը հարվածել էր լրագրողին ու կոտրել նոութբուքը։

Նախարարի հնարավոր հրաժարականին նաև քաղաքական երանգ է հաղորդվում։ Նշվում է, որ իբր Արշակյանը հիասթափված է իշխանական կուսակցության կողմից իրականացվող քաղաքականությունից և որոշել է հրաժարական տալ, իսկ կուսակիցներն Արշակյանի այդ քայլը գնահատել են որպես քաղաքական պատասխանատվությունից փախչելու փորձ, ավելին, որ Արշակյանը ներառված է կուսակցության վարչության անդամների կազմում։–0–