ԵՐԵՎԱՆ, 2 մայիսի․/Նովոստի–Արմենիա/․ Ընդդիմադիր «Հայաստան» խմբակցության քարտուղար Արծվիկ Մինասյանը հինգշաբթի խորհրդարանում անդրադարձավ Տավուշի սահմանամերձ Կիրանց գյուղում ստեղծված լարված իրավիճակին։
Այսօր առավոտյան ոստիկանությունը բերման է ենթարկել 30 բնակիչների (նրանց ազատ են արձակել մի քանի ժամ անց)։ Ադրբեջանի հետ սահմանի այս հատվածում Հայաստանի պաշտպանության նախարարությունը ականազերծման աշխատանքներ է իրականացնում։
Ինչպես նշեց Մինասյանը, նախօրեին ՀՀ վարչապետ Նիկոլ Փաշինյանը Հանրային հեռուստատեսությամբ դիմել էր Կիրանցում իր «սիրելի քույրերին ու եղբայրներին», և լուսադեմին այդ «սերը» դրսևորվեց ոստիկանների բռնության տեսքով։
«Կիրանցիներին ծեծելով և ջարդելով տեղափոխել են ոստիկանական բաժանմունքներ, ինչը նշանակում է, որ մենք գործ ունենք մի իշխանության հետ, որը ոչ մի բանի առաջ չի կանգնում՝ սեփական ժողովրդին ահաբեկելով, ծեծելով, ջարդելով, զնդանները լցնելով փորձում է իր հակապետական ծրագիրը կյանքի կոչել»,- ասաց Մինասյանը։
Նրա խոսքով, նման պահվածքը պետք է դատապարտվի և ունենա կոնկրետ հետևանքներ։
Նախօրեին Փաշինյանը Հանրային հեռուստաընկերությանը տված հարցազրույցում խոստացել էր պաշտպանել կիրանցիներից յուրաքանչյուրի իրավունքները, արժանապատվությունն ու անվտանգությունը։
Ծանոթացեք լուրերին առաջինն ու քննարկեք դրանք մեր Telegram-յան ալիքում