ԵՐԵՎԱՆ, 25 սեպտեմբերի./Նովոստի–Արմենիա/. Դատարանը քննում է ԲՀԿ առաջնորդ Գագիկ Ծառուկյանի խափանման միջոցի հարցը։
ՀՀ գլխավոր դատախազի խորհրդական Գոռ Աբրահամյանը սեպտեմբերի 22–ին այս թեմայով գրառում էր կատարել Facebook–յան իր էջում։
Նա պարզաբանել էր, որ Գագիկ Ծառուկյանի նկատմամբ կալանքը որպես խափանման միջոց ընտրելու որևէ նոր միջնորդություն չի ներկայացվել դատարան:
Загружается новость ... "Лево"
Սեպտեմբերի 23–ին կայանալիք դատական նիստում քննարկվելու է այն միջնորդությունը, որի կապակցությամբ առաջին ատյանի դատարանի կայացրած մերժման որոշումը դատախազության կողմից բողոքարկվել էր ՀՀ վերաքննիչ դատարան և վերջինս կայացրել էր դատախազության բողոքը մասնակիորեն բավարարելու, առաջին ատյանի դատարանի դատական ակտը բեկանելու և նույն դատարան նոր քննության ուղարկելու վերաբերյալ:
Հիշեցնենք, սակայն, որ սեպտեմբերի 23–ին նիստը չկայացավ, քանի որ պաշտպանական կողմը պատշաճ չէր ծանուցվել նիստի անցկացման մասին։
Գոռ Աբրահամյանը նաև պարզաբանել է, որ խնդիրն այն է, որ ՀՀ վճռաբեկ դատարանը կայացրել է վերաքննիչ դատարանի վերոնշյալ որոշման դեմ ՀՀ դատախազության և պաշտպանության կողմի ներկայացրած բողոքները վարույթ չընդունելու մասին որոշում, այսինքն ուժի մեջ է մտել Վերաքննիչ դատարանի որոշումը, որի հիմքով էլ Առաջին ատյանի դատարանը միջնորդությունը կրկին քննելու համար դատական նիստ է նշանակել, ինչի մասին դատախազությանը տեղեկացվել է նախորդ ուրբաթ օրը՝ սեպտեմբերի 18-ին:
«Այս իմաստով ուղղակի անընդունելի են դեռևս չկայացած դատական նիստի կանխորոշված ելքի վերաբերյալ հրապարակումները, ինչպես նաև բացարձակապես իրավական հարթությունում գտնվող գործընթացը քաղաքականացնելու և ինչ-որ քաղաքական հայտարարությունների լույսի ներքո ներկայացնելու մանիպուլյատիվ փորձերը», – նշել է Աբրահամյանը։
Հիշեցնենք, որ Գագիկ Ծառուկյանին մեղադրանք է առաջադրվել ՀՀ ՔՕ 154.2 հոդվածով (ընտրողի կողմից թեկնածուներից, կուսակցություններից (կուսակցությունների դաշինքներից), հանրաքվեի քարոզչական նախաձեռնություններից կաշառք ստանալը կամ թեկնածուների, կուսակցությունների (կուսակցությունների դաշինքների), հանրաքվեի քարոզչական նախաձեռնությունների կողմից ընտրողներին կաշառք տալը կամ ընտրողի ազատ կամքի իրականացմանը խոչընդոտելը):
Ծառուկյանն առաջադրված մեղադրանքը չի ընդունում և այն որակում է ապօրինի։
Երևանի ընդհանուր իրավասության առաջին ատյանի դատարանը հունիսի 21–ին հրապարակեց Գագիկ Ծառուկյանին կալանավորելու ԱԱԾ միջնորդության վերաբերյալ որոշումը։ Ըստ որոշման ԲՀԿ առաջնորդը չկալանավորվեց։ Դատավորը, սակայն, արձանագրել էր, որ առկա է հիմնավոր կասկած, որ Ծառուկյանն առնչվում է իրեն մեղսագրվող արարքներին:
Դատարանի որոշումը բողոքարկել էին երկու կողմերն էլ: Մասնավորապես դատախազությունը վերաքննիչ բողոք էր ներկայացրել կալանավորման հիմքերի բացակայության դեմ՝ խնդրելով բեկանել դատարանի որոշումը և կալանավորել Ծառուկյանին, իսկ պաշտպանական կողմը՝ հիմնավոր կասկածի առկայության և մի շարք այլ հանգամանքների դեմ: Հուլիսի 8-ին վերաքննիչ դատարանը մերժել էր պաշտպանական կողմի բողոքը, իսկ դատախազության բողոքը մասնակի էր բավարարել. առաջին ատյանի դատարանի որոշումը բեկանվել էր, սակայն Ծառուկյանը չէր կալանավորվել, և գործը հետ էր ուղարկվել՝ նոր կազմով նոր քննության:–0–