Արմեն Սարգսյանի աշխատակազմը հայտարարություն է տարածել նախագահի կողմից հրավիրված հանդիպման կապակցությամբ

ԵՐԵՎԱՆ, 13 մարտի./Նովոստի–Արմենիա/. ՀՀ նախագահի աշխատակազմը հայտարարություն է տարածել նախագահի կողմից հրավիրված հանդիպման կապակցությամբ։

Հիշեցնենք, որ մարտի 11–ին ՀՀ նախագահը վարչապետ Նիկոլ Փաշինյանին, ԱԺ խմբակցությունների ղեկավարների և Հայրենիքի փրկության շարժման ղեկավարներին հրավիրել է հանդիպման` առկա իրավիճակը քննարկելու և ճգնաժամը հաղթահարելուն ուղղված փոխընդունելի լուծումներ գտնելու նպատակով։

«Հաշվի առնելով, որ մարտի 13-ին Հանրապետության նախագահի նստավայր հանդիպման հրավիրվածներից «Իմ քայլը» և «Լուսավոր Հայաստան» խորհրդարանական խմբակցություններն ընդունել են հրավերը, «Բարգավաճ Հայաստան» խորհրդարանական խմբակցությունը և Հայրենիքի փրկության շարժումը հանդիպման համար առաջարկել են իրենց օրակարգն ու պայմաններ ներկայացրել, այս պահին մեկ սեղանի շուրջ հանդիպման ձևաչափը դառնում է անիրագործելի», – նշվում է հայտարարության մեջ:

Նախագահ Արմեն Սարգսյանը շարունակելու է իր ջանքերը և պատրաստ է առանձին հանդիպումներ ունենալ ինչպես հրավիրվածների, այնպես էլ Ազգային ժողովի խմբակցություններում չընդգրկված պատգամավորների և արտախորհրդարանական տարբեր քաղաքական ուժերի ներկայացուցիչների հետ:

«Այդ հանդիպումները հնարավորություն կտան ևս մեկ անգամ լսել բոլորի տեսակետները, ավելի հստակեցնել դիրքորոշումները և դրանց հիման վրա ձևավորել աշխատանքային օրակարգ: Հանրապետության նախագահը վերահաստատում է իր այն համոզմունքը, որ տարաձայնությունների կարգավորման միակ ուղին բանակցություններն ու երկխոսությունն են, և պետք է անել ամեն ինչ` երկիրը զերծ պահելու ցնցումներից», – հայտնում են ՀՀ նախագահի աշխատակազմից:–0–