7 800-ից ավելի անձ վերականգնել է վարորդական իրավունքի վկայակաները` պետական տուրքի վճարմամբ. ՆԳՆ
ԵՐԵՎԱՆ, 14 օգոստոսի․/Նովոստի–Արմենիա/․ Հայաստանում ավելի քան 7 800 անձ պետական տուրք վճարելու միջոցով վերականգնել է վարորդական իրավունքը, հայտարարել է ՆԳ նախարարի ժամանակավոր պաշտոնակատար Արմեն Ղազարյանը։
«7 800-ից ավելի անձ առանց որակավորման քննությունների վերականգնել է վարորդական իրավունքի վկայականները պետական տուրքի վճարման ճանապարհով, - ասաց Ղազարյանն այսօր ասուլիսի ժամանակ։
Հիշեցեննք, որ հուլիսի 6-ից քաղաքացիները կարող են դիմել վարորդական իրավունքի վերականգնման համար։
Նոր ընթացակարգով նախատեսվում է՝
1.վարելու իրավունքից զրկելու մասին ոստիկանության՝ ուժի մեջ մտած ակտի հիմքով դադարեցված վարելու իրավունքը՝ զրկման ժամկետը լրանալուց հետո 1 տարվա ընթացում դիմելու և օրենքով սահմանված պետական տուրքը՝ հիսուն հազար դրամ վճարելու դեպքում, անձը կարող է վերականգնել վարելու իրավունքը առանց որակավորման քննություններ հանձնելու,
2.1 տարի ժամկետով փորձաշրջան սահմանվելու դեպքում 13 միավորի փոխարեն հատկացնել 6 միավոր,
3. փորձաշրջանում գտնվող անձի կողմից 6 տուգանային միավորը սպառելու դեպքում նա կզրկվի տրանսպորտային միջոցներ վարելու իրավունքից մեկ տարի ժամկետով։
Փաթեթով նախատեսվում է նաև անցումային դրույթ․ 2020 թվականի հունվարի 1-ից հետո վարորդական իրավունքից զրկված անձինք միայն մեկ անգամ հնարավորություն կունենան վերականգնելու իրենց վարելու իրավունքը՝ առանց որակավորման քննություններ հանձնելու։ Հաջորդիվ զրկումների դեպքում վարելու իրավունքի վերականգնումը կիրականացվի որակավորման քննություններ հանձնելուց հետո։
Կարդացեք նաև․ Ի՞նչ փոփոխություններ են նախատեսվում վարորդական իրավունքի ստացման քննական հարցաշարերում
