34-ամյա կնոջ մահվան հետքերով. ձերբակալվել է մահացածի ամուսինը

ԵՐԵՎԱՆ, 4 օգոստոսի. /Նովոստի–Արմենիա/. Քրեական գործ է հարուցվել նախօրեին 34-ամյա կնոջ մահվան փաստով։

Երեկ ժամը 06:35-ին, «Շտապբուժօգնություն» ՊՓԲ ընկերությունից ահազանգ է ստացվել առ այն, որ Երևան քաղաքի Թումանյան փողոցի բնակարաններից մեկում մահացել է 1983 թվականին ծնված Մ. Աղաջանյանը։

Անմիջապես դեպքի վայր է մեկնել քննչական-օպերատիվ խումբը, որտեղ հայտնաբերվել է 34-ամյա կնոջ դին՝ բռնության հետքերով:

Դեպքի առթիվ ՀՀ ՔԿ Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 112-րդ հոդվածի 2-րդ մասի 14-րդ կետի հատկանիշներով` ծանր մարմնական վնաս հասցնելով անզգուշությամբ մահ պատճառելը։


Ինչպես հայտնում է Հայաստանի քննչական կոմիտեի մամուլի ծառայությունը, ձեռնարկվել անհրաժեշտ քննչական գործողություններ՝ կնոջ՝ մարմնական վնասվածքներ ստանալու հանգամանքները պարզելու ուղղությամբ, հարցաքննվել տարբեր անձինք։

Փաստական տվյալներ են ձեռք բերվել, որ Մ. Աղաջանյանը ամուսնու կողմից պարբերաբար ենթարկվել է բռնությունների: Նշանակվել է դատաբժշկական փորձաքննություն՝ կնոջ մահվան պատճառը պարզելու նպատակով: 34-ամյա կնոջ ամուսինը ձերբակալվել է՝ բռնություն գործադրելու կասկածանքով:

Նախաքննությունը շարունակվում է։ -0-