ԵՐԵՎԱՆ, 1 ապրիլի./Նովոստի–Արմենիա/. 2015 թվականի հուլիսին փաստաբան Ռուզաննա Ազրոյանը տուգանվել է Երևանի Եղվարդի խճուղում արագությունը գերազանցելու համար, գրում iravaban.net–ը։
Ըստ Ճանապարհային ոստիկանության որոշման՝ նա երթևեկել է 57կմ/ժ, իսկ թույլատրելի արագությունը՝ 40կմ/ժ է:
Ըստ հայցվորի՝ բնակավայրերում մարդատար տրանսպորտային միջոցների երթևեկությունը թույլատրվում է 60կմ/ժ ոչ ավելի արագությամբ, իսկ բնակավայրերից դուրս՝ 90 կմ/ժ ոչ ավելի արագությամբ:
Ազրոյանը նշել է, որ իր մեքենան հանդիսանում է մարդատար ավտոմեքենա, ուստի մեքենան վարելիս` թույլատրելի արագությունը բնակավայրերում 60կմ/ժ է:
Ըստ հայցի՝ Երևան քաղաքը բնակավայր է, իսկ Եղվարդի խճուղիում չկան «Բնակելի գոտի» կամ «Բնակելի գոտու վերջ» նշաններ, ուստի այնտեղ թույլատրելի արագությունը 60կմ/ժ է:
Պատասխանողը հայցադիմումի պատասխան չի ներկայացրել: Լսելով հայցվորի բացատրությունները, հետազոտելով և գնահատելով ներկայացված ապացույցները` դատարանը եզրակացրել է, որ հայցը ենթակա է բավարարման:
«Ճանապարհային երթևեկության անվտանգության ապահովման մասին» ՀՀ օրենքի 9-րդ հոդվածի «գ» կետի համաձայն՝ ՀՀ կառավարության բացառիկ իրավասությունն է հանդիսանում ճանապարհային երթևեկության կանոնների հաստատումը: Ըստ դատարանի՝ տվյալ դեպքում հայցվորի նկատմամբ վարչական հարկադրանքի սահմանման (տուգանք նշանակելու) հիմքում դրվել է Ծառայության կողմից ընդունված վարչական ակտը, որը տեղադրված է Երևանի Եղվարդի խճուղում, որով սահմանված առավելագույն արագությունը կազմում է 40կմ/ժ: Այսինքն՝ Ծառայության կողմից ընդունված վարչական ակտն ունի այնպիսի բովանդակություն, որից ուղղակիորեն բխում է, որ բնակավայրի տվյալ ճանապարհահատվածում հնարավոր է երթևեկել 40կմ/ժ չգերազանցող արագությամբ: Մինչդեռ, դատական ակտում ամրագրված հիմնավորումները երևան են գալիս փաստագրելու, որ Ծառայությունն իրավասու չէ բնակավայրում տեղադրել 60կմ/ժ արագությունից պակաս առավելագույն արագություն սահմանող ճանապարհային նշան:
Սա նշանակում է, որ տվյալ դեպքում 60կմ/ժ արագությունից պակաս առավելագույն արագություն սահմանող ճանապարհային նշանը (այլ ձևի վարչական ակտը) ընդունվել է խախտմամբ: Այսպիսով Վարչական դատարանը՝ նախագահությամբ դատավոր Կարեն Ավետիսյանի վճռել է Ռուզաննա Ազրոյանի հայցը բավարարել: Անվավեր ճանաչել Երևանի Եղվարդի խճուղում տեղադրված թիվ 3.24 ճանապարհային նշանը (վարչական ակտը), և որպես հետևանք` վերացնել նշված վարչական ակտի կիրառմամբ Ռուզաննա Ազրոյանի նկատմամբ ընդունված տուգանքը:
Ճանապարհային ոստիկանության իրավաբանական բաժնի պետ Արման Չիլինգարյանն իր հերթին պարզաբանեց, որ նշված դատավճիռը կայացվել է 2016 թ.–ի մարտի 29–ին, և այն դեռ ուժի մեջ չի մտել։ Դատավճիռը դեռևս բողոքարկման ժամանակահատվածում է։
«Ճանապարհային ոստիկանությունը, համակարծիք չլինելով վճռի եզրափակիչ մասի հետ, բողոքարկելու է այդ վճիռը Վերաքննիչ դատարանում, անհրաժեշտության դեպքում` նաև Վճռաբեկ դատարանում», – նշեց Չիլինգարյանը։
Նա տարօրինակ համարեց այն փաստը, որ «վճիռը դեռևս ուժի մեջ չմտնելով` շահարկվում է որպես նախադեպ»։
«Ցանկանում եմ տեղեկացնել, որ առաջին ատյանի դատական ակտը դեռևս չի կարող համարվել նախադեպի ուժ ունեցող, քանի որ դեռևս ուժի մեջ չի մտել», – ասաց Չիլինգարյանը։
Նա նշեց, որ նախկինում ևս եղել են նմանատիպ գործերով դատական լսումներ, դատական ընթացակարգեր, որոնք ևս ավարտվել են վճիռներով, սակայն արդեն ՃՈ–ի օգտին։
«Տեղադրված նշանները, որոնք սահմանափակում են երթևեկության առավելագույն արագությունը, ճանաչվել են դատարանի կողմից իրավաչափ», – ավելացրեց Չիլինգարյանն ու ընդգծեց, որ վերջին վճիռները, որոնք ուժի մեջ են մտել և կայացվել են ՃՈ–ի օգտին, ավելի շատ են մոտ նախադեպ համարվելուն, քան Ռուզաննա Ազրոյանի գործով վճիռը, որը դեռ ուժի մեջ չի մտել։ –0–
